Gever – Dayikên Aştiyê yên Geverê ku têkildarî hevdîtinên bi Rêberê PKKê Abdullah Ocalan re dest pê kirin axivîn û diyar kirin ku baweriya wan bi Abdullah Ocalan heye û gotin: “Ji aliyekê aştî, ji aliyekê jî şer, tecrîd, zext nabe. Me ji bo aştiyê gavek avêt, divê dewlet jî gavan biavêje.”
Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî) ji bo peyamên Rêberê PKKê Abdullah Ocalan bi gel re nîqaş bikin li gelek bajaran “Çalakiyên Aştiya Civakî û Azadiyê” li dar dixe. Di heman çarçoveyê de li navçeya Geverê ya Colemêrgê jî bi gel re civîn hat lidarxistin. Dayikên Aştiyê ku tev li civînê bûn, metirsî û xwestekên xwe anîn ziman û banga gavavêtinê li desthilatê-dewletê kirin.
‘Bila dewlet gavan biavêje’
Dayika Aştiyê Belgîn Polat bal kişand ser têkoşîna Kurdan ya aştiyê û diyar kir ku gelê Kurd her tim aştîxwaz bûye û got ku hemû gavên ku ew diavêjin ji bo aştiyê ne. Belgîn Polat destnîşan kir ku ew xwînê, girtinê, kuştinê naxwazin û ev tişt got: “Hêvî dikim di vê pêvajo de ti xapandin û xiyanet nebe. Divê dewletên navneteweyî jî zextan li dewleta Tirk bikin ku dest ji polîtîkayên zextan, xwîn rijandinê, qeyûman, tecrîda li ser Serok û girtiyan berde. Baweriya me bi hêza me heye, bila dewleta Tirk jî gavekê biavêje. Ji xwe me gava xwe avêtiye, serkeftin ji bo me hemûyan.”
‘Em aştiyeke birûmet dixwazin’
Dayika Aştiyê Emîne Atak jî anî ziman ku nêzîkatî û kirinên desthilatê-dewletê bawerî nade wê û got ku baweriya wan bi dewletê nayê. Emîne Atak bi lêv kir ku ew heta vê kêliyê jî bi hêza xwe hatine û wiha got: “Em her dem aştixwaz bûn û me destê aştiyê her dem dirêj kiriye. Em dayikên aştiyê ne û çi deşt û dol nemane ku me lê banga aştiyê nekiriye. Lê mixabin wan hertim şer û xwîn xwestiye, hemû cîhan vê yekê dibîne lê kerr û lal in. Em aştiyeke birûmet dixwazin. Heke ew jî aştiyê bixwazin, bila ewilî tecrîda li ser Serok rakin. Heta tecrîd ranebe û Serok neyê berdan ti aştî çênabe. Baweriya me tenê bi Serok û hêza me ku heta niha pêşkêşî kiriye û Kurd li ser pêyan girtine, tê. Bi salan e Kurd tên xapandin, lê êdî em hişyar bûn e. Em ne kurdên berê ne. Ji aliyekê şer, bombebaran, çekên kîmyewî û ji aliyekê ve jî dibêjin ‘Bila Ocalan bê meclisê’. Ka aştî? Hêvî dikim çêbibe.”
‘Em ê yekitiya xwe berfirehtir bikin’
Dayika Aştiyê Mehsîma Yaşar jî bal kişand ser hevdîtinên li Îmraliyê û da zanîn ku ji van hevdîtinan kêfxweş in. Mehsîma Yaşar anî ziman ku baweriya wan bi Abdullah Ocalan û gelê wan heye û got ku gelê Kurd her tim aştîxwaz bûye. Mehsîma Yaşar diyar kir ku divê dewlet jî destê wan ê aştiyê bigire û got: “Ev sed sal in me dixapînin, lê vê carê baweriya me ji me heye û em careke din nayên xapandin. Keda me ya dayikên kezebşewat, hêza me û girtiyên me gelek destkeftî bi xwe re anîn. Me Kurdan yekitiya xwe çêkiriye û em ê hê jî berfirehtir bikin. Baweriya me bi hêza me heye û divê dijminên me jî vê yekê baş bizanin. Divê her kes jî destê aştiyê bigire û heke em Kurd yek bin, em ê her tiştî ava bikin.”
