Hevseroka Giştî ya DEM Partiyê Tulay Hatîmogullari serdana çalakiya gireva birçîbûnê ya Karkerên Madenê yên ji bo heqdestê xwe yê nehatiye dayîn di çalakiya gireva birçîbûnê de ne, kir û got ku heta daxwazên karkeran pêk were ew ê di nava piştgiriyê de bin.
Karkerên Madenê yên giredayî Sendîkaya Xweser a Karkerên Madenê yên di şîrketa madenê ya bi navê Dorukê de dixebitîn ji bo heqdestê xwe yê nehatiye dayîn û mafên xwe yên tezmînatê bi dest bixin, ji Eskîşehîrê ber bi Enqereyê ve meşiyabûn, li parqa Kurtuluş a navçeya Çankaya ya Enqereyê çalakiya gireva birçîbûnê didomînin. Karkerên madenê ku piştî di binçavan de hatin berdan dûh li parqa Kurtuluşê çalakiya xwe berdewam kirin û îro jî tevî baranê jî çalakiya domandin. Ji dûh ve serdana partiyên siyasî, saziyên demokratîk û sendîkayên civakî ji bo piştgiriyê çalakiya karkeran berdewam dike. Îro jî zarok û malbatên karkerên madenê jî hatin Enqereyê û karkerên madenê bi malbatên xwe ve çalakiyê didomînin. Karkerên madenê bi malbatên xwe ve di bin baranê de bi dovîzên daxwazên wan li ser dinivisînin çalakiya xwe didomînin.
Hevseroka Giştî ya DEM Partiyê Tulay Hatîmogullari bi parlamenter Burcugul Çubuk, Ferît Şenyaşar, Îbrahîm Akin, Huseyîn Ogan û Celal Firat ve jî ji bo piştgiriyê serdana çalakiya karkeran kir. Tulay Hatîmogullari ji aliyê karkeran ve bi çepik û berzkirina dirûşmeyan hat pêşvazîkirin. Serokê Sendîqaya Xweser a Karkerên Madenê Gokay Çakir jî xêrhatina Tulay Hatîmogullari kir û anî ziman ku heta daxwazên wan pêk weren ew dê çalakiya xwe bidomînin û wiha got: “Li Enqereyê 2 caran em hatin binçavkirin. Em ji bo daxwazên xwe hatin Enqereyê. Em îro ji bo bidestxistina heqdestê xwe çûn şîrketa Yildiz û li wir hevdîtin kir. Lê daxwazên me nehatin qebûl kirin. Îro 23ê Nîsanê ye. Zarokên me şuna di dibîstanan de bin li vir bi me re di nava çalakiyê de ne. Heta daxwazên me bi cih werin em ê çalakiya xwe bidomînin.”
‘Em ê bi hev re li ber xwe bidin’
Tulay Hatîmogullari jî diyar kir ku ew ê wek DEM Partî hertim bi karkeran re di nava piştgiriyê de bin û wiha axivî: “Binçavkirina karkerên heqe xwe digerin bê edaletiyeke mezin e. Destilatê bi vê yekê nîşan da ku ew ne li cem karkeran e lê li rex sermayedaran e. Em wek DEM Partî dê heta dawiyê li rex karkeran bin. Em ê bi hev re li ber xwe bidin. Çi pêwîstê em ê bikin. Li parlamentoyê jî daxwazên wê bînin ziman. Ji bo ew berxwedan bigeheje serkeftinê em ê jî em ê bi hev re têbikoşin. Parlamenterên me jî hertim li cem we ne. Çi pêwîstî hebe jê re bejin û em li parlamentoyê bînin ziman.”
Çalakiya îro bi berzkirina dirûşmên, “Em karker in, mafdar in û dê biserbikevin”, “Şîrketan neparêze heqê me bidin” û “Em hatin heqe xwe bigirin” bi dawî bû.
