Festîvala Rojên Amarayê, bi fînalên tûrnûvaya voleybol û futbolê berdewam dike. Tîmên serkeftî bi kûpa û madalya hatin xelatkirin.
Di çarçoveya 77emîn salvegera rojbûna Rêberê Gelê Kurd Abdullah Ocalan de, Rojên Festîvala Amarayê ya ku bi dirûşma “Bi Rêbertiya Azad re Yekîtiya Neteweyî ya Demokratîk” hatiye organîzekirin, didomin.
Festîvala ku li Parka 4ê Nîsanê ya li navenda Xelfetiyê pêk tê, bi fînalên tûrnûvaya voleybolê ya jinan û tûrnûvaya futbolê ya mêran berdewam dike. Di qada voleybolê ya ku li qada festîvalê ya li Parka 4ê Nîsanê hatibû sazkirin de, tîmên Amara û Rahîmeyê hatin pêşberî hev. Di pêşbirka voleybolê ya ku gel eleqeyeke mezin nîşan dayî de, tîma Amarayê bi ser ket. Piştre tîma Amara û tîma Rihayê hatin hemberî hev. Di pêşbirka fînalê de jî tîma Amarayê bi ser ket. Kûpa û madalya radestî tîma serkeftî hatin kirin.
Di çarçoveya Festîvala Rojên Amarayê de yek ji çalakiyên din ên girîng jî tûrnûvaya futbolê bû. Fînala tûrnûvaya futbolê ya ku ev 3 roj in berdewam dike, li Goganê hat lîstin. Tîma Sporê ya Berxwedana Zindanê ya 30 Salî û RÎHA DEKUP hatin pêşberî hev. Pêşbirk ji aliyê Tîma Berxwedana Zindanê ya 30 Salî ve hat qezenckirin. Veysî Aktaş û Çetîn Arkaş kûpa dan tîma serkeftî. Pêşbirk, bi dirûşmên “Jin, jiyan, azadî” û “Bijî Serok Apo” bi dawî bûn.
Piştî bernama tûrnûvayê Koma Govendê a Amedê derket li qadê govend gerandin.
