Komeleya Pira Gelan 5emîn li Navenda Çanda Fransî “Festîvala Fîlman a Penaberan a Navneteweyî” li dar xist.
Festîvala ku îsal cara pêncemîn tê lidarxistin, dê di navbera 14 û 18ê Nîsanê de berdewam bike. Bernameya festîvalê bi nîşandana sînevîzyonê dest pê kir. Di festîvalê de dê fîlm, belgefîlm bên nişan dan û panel û hevpeyvînên bi derhêneran re dê bên li darxistin.
‘Deryaya spî ne derya ye, goristaneke komî ye’
Serokê Damezirîner ê Komeleya Pira Gelan, Cem Terzî di axaftina xwe de bal kişand ser çîroka Alan Kurdî û diyar kir ku ji ber navê wî bi kurdî bû, medyayê navê wî wekî “Aylan” belav kir, lê ew zarokekî ji Kobanê bû. Cem Terzî bal kişand ser koçberiya ji Afganistanê û got: “Afganistan 40 sal in di nav şer de ye. Her bota ku di deryayê de noq dibe, encama biryareke siyasî ye. Ev mirov bi polîtîkayên dewletan, bi peymanên vegerandinê û bi girtina sînoran hatin kuştin. Deryaya Spî êdî ne derya ye, goristaneke komî ye.”
Cem Terzî her wiha rexne li peymana di navbera Tirkiye û Yekîtiya Ewropayê de kir û destnîşan kir ku Tirkiye veguheriye “girtîgeheke vekirî”, penaber wekî “hêza karker a erzan” tên bikaranîn û rastî nîjanperestiyê tên û got: “Li Yemen, Xeze û Sûriyeyê dewlet tên hilweşandin û gel ji cih û warên xwe dibin. Paşê dipirsin ‘ev mirov çima tên Tirkiyeyê?’ Ev pirs bi serê xwe pirseke bêexlaqî ye.”
Piştî axaftina vekirinê, fîlmê derhêner Olivier Meys ê bi navê ‘Havîna Jahia’ hat nîşandan. Bernameya roja ewil bi konsera ‘Koroya Gelan’ bi dawî bû.
