Şirnex – Endamên Meclisa Dayikên Aştiyê û welatiyan têkildarî banga Rêberê Gelê Kurd Abdullah Ocalan destnîşan kirin ku ew xwedî li bangê derdikevin û gotin ku ji bo aştî pêk were divê dewlet jî gavên şênber biavêje û aştî mayînde bibe.
Rêberê Gelê Kurd Abdullah Ocalan di 27ê Sibatê de bangeke dîrokî bi navê “Banga Aştî û Civaka Demorkatîk” kir û piştî bangê PKKê jî agirbest ragihand. Banga dîrokî ya Abdullah Ocalan li Kurdistan û cihanê deng veda û hê jî dengvedana wê didome. Piştî ragihandina agirbesta ya ji aliyê PKKê ve nîqaşên li ser pêvajoyê hin zêdetir bûn. Meclisa Dayikên Aştiyê ya Şirnexê û welatiyên Şirnexê yên têkildarî banga dîrokî ji Ajansa Welat re axivîn.
‘Bila aştiyek mayînde pêk were’
Ji welatiyan Tamer Karakan anî ziman ku banga Rêberê Gelê Kurd Abdullah Ocalan dîrokî ye û wiha got: “Divê hemû kes xwedî li wê bangê derbikeve. Divê dewlet jî bersiv bide vê bangê û gavên şênber biavêje. Ji bo pêvajo biçe serî divê di serî de azadiya fizîkî ya birêz Abdullah Ocalan pêk were. Divê girtiyên siyasî hemû bên berdan. Her wiha divê dewlet êrişên xwe yên li ser Bakur û Rojhilatê Suriyeyê û başûrê Kurdistanê rawestîne. Divê dewlet jî van gavan biavêje ku ew şer bisekinê û aştiyeke mayînde pêk were. Em ê jî xwedî li wê bangê derbikevin.”
‘Divê dewlet jî gavê biavêje’
Endama Meclisa Dayikên Aştiyê Emîne Alkiş jî diyar kir ku ew weke dayik bi salan e doza aştiyê dikin û ev yek anîn ziman: “Banga birêz Abdullah Ocalan pirr girîng e. Divê hemû kes piştgiriyê bide vê bangê. Divê dewlet jî gav biavêje. Bi lîstikan ev pêvajo naçe serî. Em doza mafê xwe dikin. Bila em hemû wek hev bin û aştiyeke mayinde pêk were. Heke dewlet gav neaveje ev pêvajo naçe serî. Em li dijî lîstikan in.”
‘Em xwedî li bangê derkevin’
Welatiya bi navê Şîrîn Demîr jî têkildarî banga Abdullah Ocalan wiha axivî: “Em xwedî li vê bangê derdikevin. Em hêvî dikin piştî vê bangê pêvajoyeke xweş dest pê bike. Ev bang wê bibe pêngava aştî û azadiyê. Em dixwazin birêz Abdullah Ocalan bi awayekî fizîkî azad bibe û hemû zindan vala bibin.”
‘Êdî em naxwazin dilê dayikan bişewite’
Ji Dayikên Aştiyê Hatice Beytur jî destnîşan kir ku ew ji bo vê pêvajoyê pirr bi hêvî ne û got: “Hêviyên me pirr mezin in. Em bi hêvî ne ku ev pêvajo bibe pêvajoya aştî û azadiyê. Banga me ji hemû dayikan jî heye ku xwedî li pêvajoyê derbikevin. Dayikên Kurd û Tirk hevdû hembez bikin û aştiyeke mayinde pêk were û şer bisekine. Her wiha divê êrişên li ser Rojava jî bisekinin. Aştî tenê bi aliyekî ve pêk nayê divê her dû alî jî li gorî pêvajoyê tevbigerin û ev sal bibe sala aştî û azadiyê. Dilê me pirr şewtî ye, êdî em naxwazin dilê dayikan bişewite. Bila dewlet jî êrişên xwe rawestîne. Bila birêz Abdullah Ocalan bi awayekî fizîkî azad bibe û deriyên zindanan vebin. Em hemû wekhev bi hev re bijîn, tenê daxwaza me ev e.”
‘Êdî bes e xwîn herikî’
Ji welatiyan Salîh Yilmaz jî anî ziman ku divê dewlet jî gavên şênber biavêje û wiha got: “Em dixwazin aştî û wekhevî pêk were. Em şer naxwazin. Heta kengî ev xwîn wê biherike. Êdî bes e em dixwazin ev xwîn bisekine. Bila deriyên heps û zindanan vebe û dewlet jî gavên şênber biavêje.”
