Şirnex – Endamê YNKê Elî Oremar destnîşan kir ku banga Rêberê Gelê Kurd Abdullah Ocalan bandoreke erênî li ser Başûrê Kurdistanê jî kiriye û got: “PKKê bersiv da û agirbest ragihand. Lê heta niha êrişên Tirkiyeyê li herêmê berdewam dikin.”
Rêberê Gelê Kurd Abdullah Ocalan di 28ê Sibatê de bi rêya şandeya Partiya Wekhevî û Demokrasiyê ya Gelan (DEM Partî) bangeke dîrokî kir. Banga Abdullah Ocalan li her çar aliyên Kurdistanê deng veda û li tevahiya Kurdistan û cîhanê jî nîqaşên li ser banga Rêberê Gelê Kurd berdewam dikin. Abdullah Ocalan di daxuyaniya dîrokî da banga çekberdanê li PKKê kir û destnîşan kir ji bo çek bên berdan jî wiha got: “Bêguman ji bo di pratîkê de çek werin berdan û PKK xwe fesix bike, divê siyaseta demokratîk û hiqûqî bê naskirin.” Piştî banga Abdullah Ocalan PKKê jî agirbest ragihand û diyar kir ku ew piştgiriya banga Abdullah Ocalan dikin. Tevî ragihandina agirbesta PKKê jî êrişên Tirkiyeyê li ser herêmên li ser Başurê Kurdistanê didomin.
Endamê Yekitiya Niştimaniya Kurdistan (YNK) siyasetmedar Elî Oremar, têkildarî banga Abdullah Ocalan, agirbesta ji aliyê PKKê ve hat ragihandin û êrişên Tirkiyeyê li ser herêmê ku didomin ji Ajansa Welat (AW) re nirxand.
‘Banga dîrokî li Başurê Kurdistanê bi coş hat pêşwazîkirin’
Elî Oremar anî ziman ku banga dîrokî ya Abdullah Ocalan li Başûrê Kurdistanê jî ji aliyê gel ve bi coşeke mezin hat pêşwazîkirin û wiha got: “Banga birêz Abdullah Ocalan li hemû cîhanê deng veda. Helbet bandora wê ya li ser Başûr jî berdewam dike. Di banga birêz Abdullah Ocalan de xuyayê ku pêvajoya aştiyê ne tenê li Bakurê Kurdistanê wê bandorê li tevahî Kurdistanê jî bike. Ji ber ku çend sal in êrişên Tirkiyeyê li Başûr berdewam dikin. Bi dehan baregehên Tirkiyeyê li Başûr hatine çêkirin. Ji ber wê jî banga birêz Abdullah Ocalan li Başûrê Kurdistanê weke mizgîniyeke hat pêşwazîkirin. Ji ber êrişên Tirkiyeyê nezî 30 kîlometre axa Başûr hatibû dagirkirin û gefa dagirkirinê ya Tirkiyeyê li ser Başûr heye. Dema şandeya DEM Partî serdana Başûrê Kurdistanê kir û bi YNKê û PDKê re hevdîtin kirin hat xûyakirin ku rola Başûrê Kurdistanê di vê pêvajoya aştiyê de gelekî girîng e. Banga birêz Ocalan ji aliyê partiyên siyasî yên Başûr ve jî bi êrênî hat pêşwazîkirin.”
‘Ji bo aştiyê Başûr cihekî sereke ye’
Elî Oremar têkildarî hevdîtina şandeya DEM Partiyê bi partiyên Başûrê Kurdistanê re jî anî ziman ku partiyên Başûr di vê pêvajoyê de rolekî girîng digirin ser xwe û wiha domand: “Şandeya DEM Partî di serdanên xwe yên Başûr de daxwaza piştgiriya pêvajoyê kirin. Hem bi PDKê û hem jî bi YNKê re hevdîtin hatin kirin. Rola her dû partiyan jî li Başûr pir girîng e. Ji bo aştiyê Başûrê Kurdistanê wê cihekî herî sereke bigire. Ji ber ku hevdîtin, dan û standina ser aştiyê wê li Başûrê Kurdistanê bibin. Heke PKK kongreya xwe kom bike dibe ku ew cih ne Qandîl be li deverekî din a Başûrê Kurdistanê be. Pêvajoya çekberdanê û di derbasbûna qonaxeke nû de Başûrê Kurdistanê jî wê bi rola xwe rabe. Beşdariya her dû partiyên mezin ên Başûrê Kurdistanê li pêvajoyê ji ber wê jî pir girîng e. Şandeya DEM Partî jî ji ber vê yekê serdana her dû partiyan kir û hevdîtin pêk anîn.”
‘Wê bandorê li tevahî Kurdistanê bike’
Elî Oremar di berdewama axaftina xwe de destnîşan kir ku banga dîrokî ya Rêberê Gelê Kurd Abdullah Ocalan wê bandoreke erênî li tevahiya Kurdistanê bike û ev yek anîn ziman: “Bandora krîza aborî li ser Tirkiyeyê heye. Tirkiye di qonaxeke metirsiyê de ye. Ji ber wê jî berjewendiya Tirkiyeyê jî di pêvajoyê de ye. Helbet ew pêvajo biçe serî ji bo gelê Kurd jî serkêftineke mezin e. Çerçoveya bangawaziya birêz Abdullah Ocalan ji bo her çar aliyên Kurdistanê jî serkêftineke mezin e. Li Başûrê Kurdistanê gefa dagirkirinê ya Tirkiyeyê heye. Dewleta Iraqê jî daxwaz kiriye ku heke PKK çekan berde divê dewleta Tirk baregehên xwe ji Başûrê Kurdistanê rake. Ev yek ji bo Başûrê Kurdistanê jî başiyê tîne. Gefên Tirkiyeyê li ser Başûrê Kurdistanê jî diqedin. Her wiha li ser Rojavayê Kurdistanê jî êriş ranewestiyan e. Gefên Tirkiyeyê li wir jî hene. Birêz Ocalan jî ji bo hemû aliyên Kurdistanê çerçoveya aştiyê daniye. Heke ev pêvajo bi ser bikevê êrişên Tirkiyeyê li ser Başûr û Rojava jî dê biqedin. Rojhilatê Kurdistanê jî wê di vê pêvajoyê de bandoreke erênî bibîne.”
‘Êrişên Tirkiyeyê berdewam dikin’
Elî Oremar bal kişand ser êrişên Tirkiyeyê li ser herêmê û axaftina xwe wiha bi dawî kir: “Piştî banga birêz Abdullah Ocalan PKKê jî bersiv da û agirbest ragihand û piştgiriya pêyama birêz Ocalan kir. Lê Tirkiyeyê heta niha li gor agirbestê tevnegeriyaye û êrişên Tirkiyeyê li herêmê berdewam dikin. Tevî hemû partiyên Tirkiyeyê piştgiriya pêvajoye dikin jî destdirêjiya Tirkiyeyê li ser herêmê berdewam e. Helbet li Tirkiyeyê hinek hêz hene ku li dijî aştiyê derdikevin. Di nav leşkeriyê de jî dibe ku hinek hêz nexwazin aştî pêk were. Ji bo wê jî êriş berdewam dikin. Di berê de jî mînakên vê yekê hene ku pêvajoya aştiyê gelek caran hatiyê xerakirin. Lê rewşa Rojhilata Navîn aştiyê li ser her dû aliyan jî ferz dike. Aştî di şert û mercên niha ya Rojhilata Navîn de ji bo berjewendiya hemû kesî ye.”
