Sêrt– Hevşeredarên Sêrtê Sofya Alagaş û Mehmet Kaysî ku Wezîrê Tirk qeyûm tayînî şuna wan kir, diyar kirin ku ew biryara qeyûm nas nakin û gotin: “Em vê biryarê qebûl nakin. Heta dawiyê em ê li ber xwe bidin. Wê dîsa nekaribin bi serbikevin.”
Wezareta Karên Navxweyî yê Tirk qeyûm tayinî şeredariya Sêrtê ya Partiya Wekhevî û Demokrasiyê (DEM Partî) kir. Piştî qeyûm tayinî şeredariyê hat kirin hevşeredar Sofya Alagaş û Mehmet Kaysî ji pêywîrê hatin dûrxistin û li şûna wan Waliyê Sêrtê Kemal Kizilkaya pêywîrdar kirin. Bertekên gel li dijî tayinkirina qeyûm didomin. Her roj gelê Sêrtê bi hevşeredarên xwe re li ber avahiya şeredariyê biryara qeyûm protesto dikin. Hevşeredarên Sêrtê Sofya Alagaş û Mehmet Kaysî jî her roj bi welatiyên Sêrtê re li ber avahiya şeredariyê bertekan nîşanî biryara qeyûm didin û di nava çalakiyan de cih digirin. Hevşeredar Sofya Alagaş û Mehmet Kaysî tekildarî tayinkirina qeyûm a şeredariyê ji Ajansa Welat re (AW) axivîn û bertek nîşanî biryarê dan.
‘Biryareke siyasî ye’
Sofya Alagaş anî ziman ku ji ber kar û xebatên rojnamegeriyê ceza li wê hatiyê birin û wiha got: “Doza min berdewam dikir. Di nav dosyayê de gelek kemasî hebûn. Divê ew kemasî bihatan temamkirin. Lê dadgehê ew kemasî li berçavan negirt û lez û bez biryara ceza da. Ew biryareke siyasî ye. Jixwe dema ku em di vê dosyayê de hatin darizandin jî siyasî bû. Zexteke li ser rojnamegerên kurd bû. Piştî ku ez bûm hevşeredar jî ji bo qeyûm biavejin ji xwe re kirin hincet. Nezîkatiya heyeta dadgehê me zanî ku talîmateke siyasî girtine. Tevî kemasiyên di nava dosyayê de jî bi lez û bez ev ceza dan. Bila dadgeh nebêje em li gor hiqûqê tevgeriya ne. Ew li gor talîmatê tevgeriyane. Ev biryar li dijî vîna gelê kurd e. Li dijî vîna civan û jinan e. Li dijî vîna gelê Sêrtê ye. Bi vê biryarê dibêjin hûn bên hilbijartin jî em we nas nakin. Dibêjin ‘Me ev ax dagir kiriye û em metingeriya xwe li ser didomînin. Em nahêlin hûn bibin xwedî maf.’ Dijminatiya sed salan e.”
‘Heta dawiyê em ê li ber xwe bidin’
Sofya Alagaş di berdewama axaftina xwe de destnîşan kir ku ew ê li dijî biryara qeyûm têkoşîna xwe bidomînin û wiha pê de çû: “Em vê biryarê nas nakin. Em vê biryarê qebûl nakin. Heta dawiyê em ê li ber xwe bidin. Bila nebêjin ew ê vê biryarê qebûl bikin. Çi pêkanînên wan ên qirêj hebin em ê derxînin holê û teşhir bikin. Bila nebêje ez ê bi rihetî rûnim. Ew rihetî ji wî re tune ye. Em ê çalakiyên xwe bidomînin û wî teşhir bikin. Hemû kiryarên wan ên qirêj derxînin hole. Hê duh li ser masayê rûniştiye û 2 otobusên ku ji ber pêdiviyê me dabûn Misircê kişandiye. Ji bo ku ew şeredarî ya DEM Partiyê ye, dijminatiya xwe didomîne. Duh serdana esnafan kiriye. Tu bi çi rûyî dikeve nava gel. Tu dizî. Tu ji bo metîngeriyê hatiye. Rûye wan tune ye. Kolanên Sêrtê bikin zêr jî ew memûr e. Li Enqerê çi bibêjin li gor wê tev digerin. Tu mafê wan li vir tune ye. Bi rihetî nikare li Sêrtê bigire. Bi hezar kesî re digere. Ji ber ku ditirse.”
‘Em bi ferqa 2 hezar deng bi ser ketin’
Mehmet Kaysî jî bi lêv kir ku cara 3emîn qeyûm tayinî şeredariya Sêrtê hatiyê kirin û ew biryar li dijî hiqûqî ye. Mehmet Kaysî da zanîn ku bi lez û bez ceza li hevşeredara wan birîn û got: “Bi vê biryarê dibêjin hûn kurd in ji ber wê jî ji we re qada siyasî qedexe ye. Em 2 caran ji aliyê gel ve hatin hilbijartin. Carekê di pêşhilbijartinê de, carekê jî di hilbijartinên herêmî de em hatin hilbijartin. Tevî ku ji derve gelek kes anîn jî, nekarîn bi serbikevin. Em bi ferqa 2 hezar dengan bi ser ketin. Em dema hatin ser kar jî me dît şeredarî ji aliyê qeyûman vê hatiyê talankirin. Yên ku ne ji vî gelî bin derdê gel nizanin. Ji derve tînin û dikin şeredar.”
‘Bi tirsandinê nikarin encam bigirin’
Mehmet Kaysî diyar kir ku desthilat ji aliyekî ve qala pêvajoyê dike û ji aliyê din ve jî sepanên qeyûm berdewam dike û wiha axivî: “Ev dirûtî ye. Çi dikin bila bikin em ji doza xwe û têkoşîna xwe gav paşde naavêjin. 3 carên din jî qeyûm tayin bikin jî em ê dîsa şeredariya xwe bistînin. Îro jî em tax bi tax xebatên xwe didomînin. Em ê xwedî li vîna xwe derbikevin. 40 sal in çi ji destê wan hatiyê kirine. Lê nekarîn bi serbikevin. Wê dîsa nekaribin bi ser bikevin. Bi tirsandinê nikarin bi me gavan paşde bidin avêtin. Banga min li gelê me yê Sêrtê, gelê kurd, ereb û tirkan ew e ku xwedî li şeredariya xwe, xwedî li vîna xwe derbikevin. Ev zilm e, heqerete û bêhiqûqî ye.”
