Jinên Hesekê bi girseyî piştgirî dan YPJê û ji bo piştgiriyê meşeke girseyî li xistin.
Rêxistinên jinan li Hesekê, bi armanca teqezkirina rist û hebûna jinê ya di avakirina Sûriyeyeke demokratîk û azad de, bi tevlêbûna nûnerên hemû rêxistin û tevgerên jinan ên Bakur û Rojhilatê Sûriyeyê, meşek girseyî li dar xistin. Di meşê de hemû pêkhate, dayîk, jinên ciwan ji herêmên Bakur û Rojhilatê Sûriyeyê amade bûn. Meşvanan alên Yekîneyîn Parastin Jinê (YPJ) û pankartên “Jin di avakirina Sûriyê de esasa edalet û wekheviyê ye”, “Bi felsefeya Jin, Jiyan, Azadî xwe biparêze”, “Yekîtiya Jinên Sûrî misogeriya felsefeya Jin Jiyan Azadî ye” berzkirin. Girseyê li ber Çarxerêya Sînalko ya taxa Til Hecer dest bi meşê kir û li ber parka taxa Nasra veguherî mitîngek.
Ji Hesekê silav ji Rêberê PKKê Abdullah Ocalan re şandin
Li taxa Nasra berdevka Kongra Star a Bakur û Rojhilatê Sûriyeyê Rîhan Loqo mizgînî da meşvanan ku di vê demê de hevdîtin bi Rêber Abdulah Ocalan re tê kirin û got: “Em ji qada têkoşîn û berxwedanê silavên germ ji Rêberê xwe re dişînin û berxwedana wî silav dikin. Ev 13 sal e xelkên Rojava li beramberî sîstema netewperest, olperest û netewe-dewlet têkoşîn û berxwedanê dike. Li aliyê din li beramberî dagirkeriya Tirk û hevalbendên wê, têkoşînek mezin dimeşînin.”
Divê di avakirina Sûriya nû de vîna jina azad hebe
Rihan Loqo da zanîn ku dewleta Tirk êrişî deskeftiyên Şoreşa jinê dike û wiha axivî: “Berxwedana jinan a dîrokî bersiv dide planên dijmin. Em jin, ji her pêkhateyên ku îro sekneke xwe nîşan didin û hevgirtina xwe diyar dikin ku ev bi xwe berxwedaniyek dîrokî ye. Di avakirina Sûriyeya nû de pêwîst e îradeya jina azad were parastin. Sûriyeya Demokratîk bi deng, reng û hişmendiya jinê dê were avakirin. Ger ku jin di nivîsandina destûra Sûriyeyê de cîh negire, ne mumkin e ev Sûriyeyî were qebûlkirin û mafên gelan were parastin. Ez bang li tevahî gelan dikim ku ji bo em bi hev re Sûriyeyeke nû û demokratîk bidin avakirin, xwedî helwest bin.”
Jin kêliyên azadî û rûmetê dijîn
Endama YekItiya Jinên Suryanî Sebah Şabo diyar kir ku gelê Bakur û Rojhilatê Sûriyeyê kêliyên azadî û rûmetê dijîn û wiha domand: “13 sal bi têkoşîn, berxwedanî û serhildan derbas bû. Li vir pêwîstî heye ku em xwedî li keda van salan derkevin. Jin di Bakur û Rojhilatê Sûriyeyê de kêliyên azadî û rûmetê dijîn. Lewma parastina jinê û deskeftiyên wê, erkekî exlaqî ye, ji me her kesî tê xwestin. Bi rihê felsefeya Jin Jiyan Azadî em ê gavên pîroz bavêjin û Sûriyeyeke nû ya demokratîk ava bikin. Jin di nivîsandina destûrê de cîh negire, em vê Sûriyeyê qebûl nakin û li hemberî wê jî têkoşîna me dê bidome.”
Divê komkujiya 1915an neyê ji bîr kirin
Ji Kordînasyona Yekitiya Jinên Ermen Enahîd Qesebiyan jî destnîşan kir ku jinên Ermen komkujiya 1915an ji bîr nakin û dê hesabê wê bê dayîn. Enahîd wiha got: “Êrişên dewleta Tirk li ser herêmên Bakur û Rojhilatê Sûriyeyê, berdewama Komkujiya 1915an e. Em jinên Ermen xwe bi rêxistin dikin û hevgirtina xwe ava dikin da ku em bibin bersiv ji vê pêvajoyê re. Peyama me jî ew e ku heya jinek Ermen hebe, wê li ser wê komkujiyê hesab ji dewleta Tirk bixwaze.”
Meş bi dirûşmeya “Bijî yekîtiya jinên Sûrî “ bi dawî bû.
