Platforma Jinan a Dîcle Amedê û Tora Amedê ya li Dijî Tundiyê têkildarî tundiya li ser jinan meşiyan û gotin; “Ji bo tevahiya jinan em li vir in.”
Li Tirkiyeyê di meha nîsanê de 34 jin hat kuştin. Jin dijî kuştina jinan her roj dadikevin qadan. Li Amedê saziyên jin, endam û rêveberên DEM Partî, DBPê û gelek jin bi pêşengtiya Platforma Jinan a Dîcle Amedê (DAKAP) Tora Amedê ya li Dijî Tundiyê li pêşiya Şaredariya Bajarê Mezin a Amedê kom bûn û heta Qada Şêx Seîd meşiyan.
Di meşê de pankarta “Jin Jiyan Azadî” û “Em polîtîkayên li dijî jinê û bedena jinê qebûl nakin” hatin hilgirtin û bênavber dirûşmên “Jin Jiyan Azadî”, “Bijî berxwedana jinan”, û “Jin natirsin, hesap dipirsin” hatin berzkirin.
Piştî meşê Sekretera Egîtîm Senê ya Hejmara 1ê Amedê Arzu Koç daxuyaniyê xwend.
‘Em li vir in’
Arzu Koç diyar kir ku îro ew li vir in û wiha axivî: “Îlankirina ‘sala malbetê’ manîfestoya dewletê ye. Bi navê jin, hevjîn, dayikê tê xwestin ku jinan sînordar bikin. Em dizanin ku ew mudaxaleya polîtîk e. Lê me li vir in, ji bo tevahiya jinan em li vir in. Em li dijî yên ku dixwazin jinê di navê malê de heps bikin, li vir in.”
