Koordînasyona KJKê daxuyand ku qebûlnekirina statuya YPJê ‘êrişek îdeolojîke’ û banga xwedîderketina kampanyaya ku ji hêla Platforma Çalakiya Hevbeş a Jinan ve ji bo YPJê hatiye destpêkirin kir.
Koordînasyona KJKê di daxuyaniya nivîskî de diyar kir ku xwedîderketin, parastin û mezinkirina YPJê û destkeftiyên wê tê wateya “parastina pêşerojê”.
Daxuyaniya KJKê wiha ye:
“Bi ser damezrandina YPJê ya ku mohra xwe li şoreşa mezin xist 13 sal derbas bûn. YPJ di 4ê Nîsana 2013an de xwe wekî Yekîneyên Parastina Jinan îlan kir, di nava 13 salan de pêşengiya têkoşîna ji bo jiyaneke azad kir û di nav de bi dehan şervanên neteweyên cîhanê yên neternasyonalîst hene bi hezaran şehîd dan. Bi vê wesîleyê em di şexsê Şehîd Arîn, Silava, Barîn û Denîz de hemû şehîdên YPJê bi rêzdarî û minetdarî bibîr tînin. Em soza xwe ya parastina nirxên jiyaneke azad ên ku wan li Rojava afirandine û îlhamê dide jinên li çar aliyên cîhanê, nû dikin.
Ev 13 salan nîşan da ku YPJ ne tenê hêzek leşkerî ye, di heman demê de hêzek parastina jinane ku ji bo azadî û wekheviya jinan têdikoşe. Damezrandina YPJê rûveçûna şer û jiyana li Rojava û Sûriyeyê guherand û pêşengiya gelek guhertinan kir. YPJ dema ku li dijî DAIŞê şerê leşkerî dimeşand, di heman demê de li dijî helwestên zayendperest û nijadperest ên di nav gelê Rojava de jî têkoşiya û bû wesîleya guhertin û veguherînê.
YPJ a ku afirandina jina azad e, ji pêdiviya jinên Kurd, Ereb, Tirkmen û Suryaniyan ji bo parastina li dijî êrişên çeteyên serdest ên mêran derket holê, jinan di bin yek banî de û ji bo armancek hevpar kir yek. Berxwedan, têkoşîn û bîrdoziya wê ji sînorên Rojava derbas kir, ji bo jinên li çaraliyê cîhanê bû çavkaniya hêvî û îlhamê, ji bo yekîtiya jinan a navneteweyî û Konfederalîzma Jinan a Cîhanê bi ngeheke xurt ava kir. Dîsa bi têkoşîna xwe ya bi rûmet, ew têgînên feodal a di nav gelê Kurd de şikand, li dora keziyan wêneyek xweşik a yekîtiya neteweyî ya demokratîk a ku yek ji hewcedariyên herî bingehîn ên gelê Kurd e xêz kir.
YPJ bi berxwedana xwe ya li dijî DAIŞê navê xwe li çar aliyên cîhanê belav kir, bi paradîgmaya azadîxwaziya jinan rêya têkoşîna jinan ronî kir. Di vê wateyê de, YPJ bi qasî ji bo jinên Kurd, ji bo jinên li çar aliyên cîhanê jî di dîroka têkoşîn û berxwedanê de cihekî girîng girtiye û mîrateyek mezin afirandiye. Bi têkoşîna li dijî pergala serdestiya mêran, dagirkerî, qirkirin û zilmê hêvî afirandiye.
Ji ber ku YPJ ne tenê bûye navê têkoşîn û xweparastina li dijî vê pergala serdestiya mêran, di heman demê de bûye navê jiyanek nû û azad. Tevî xisleta wêranker a şer jî ew bûye navê avakirina jina azad û jiyana azad.
Li xwezayê tu zindî ne bêparastine, jin di tevahiya dîroka serdestiya mêran de timî ji vî mafî bêpar maye û berdêla vê bi êşên mezin daye. Şerên li Xeze, Ukrayna, Efganistan, Somalî û Îranê mînakên herî dawî yên encamên giran ên ku jinên bêparastin pê re rû bi rû mane ne. Îro tevî ku li Kurdistanê û li çaraliyê cîhanê şer mezin dibe, berdewam dike û her roj komkujiya jinan zêde dibe, nabe ku ji jinan re bibêjin “bêparastin bimînin” û ev yek tê wateya ku jinan bi awayekî bê çare mehkûmî ber destê serdestan, qatîlan û çeteyan dike.
Di pêvajoyeke wiha de ku entegrasyona di navbera Hikûmeta Demkî ya Şamê û Rojava de tê nîqaşkirin, yek ji nîqaşên herî girîng jî derbarê statûya YPJê de ye. Di serdemeke wiha de ku rêxistinbûn û êrişên çeteyan berdewam dikin û herî zêde jinan dikin hedef, nîqaşkirina statûya YPJê û nepejirandina wê ji aliyê Hikûmeta Demkî ya Şamê ve, êrişa herî mezin a li ser destkeftî û vîna jinê ye. Hikûmeta Demkî ya Şamê, bi kabîneya ku ava kiriye û bi pêşnûmezagonên xwe ve bi awayekî pir eşkere nîşan daye ku hikûmeteke çiqas zayendpereste û mafên jinan nas nake; di bin evqas êrişan de bêparastin mayîna jinan rewşeke nayê pejirandine.
Nepejirandina statûya YPJê, bêguman êrişeke îdeolojîke. Di hemû qadên jiyanê yên wekî parastin, perwerde, tenduristî û aboriyê de xwedîgotin û xwedî vînbûna jinên ku tê payîn serî bitewînin, ne rewşek e ku hikûmeteke wekî HTŞê ya ji hişmendiya DAÎŞê tê xwedîkirin bi hêsanî bipejirîne. Lê belê jin jî diqêrin ku ew ê radestî vê hişmendiyê nebin. Herî dawî, li dijî van êrişan, di 27ê Nîsanê de li Rojava Platforma Çalakiyên Hevpar a Jinan, bi armanca piştgiriya Yekîneyên Parastina Jin (YPJ), bi daxwaza ku YPJ di nava avabûna wezareta parastinê de cih bigire û statûya wê were naskirin, kampanyayek da destpêkirin. Em jî wekî KJK, vê kampanyaya watedar a ku jinan daye destpêkirin silav dikin.Xwedîderketin, parastin û mezinkirina YPJ û destkeftiyên wê yên ku stûna herî girîng a tespîta Rêber APO ya “Sedsala 21an dê bibe sedsala jinê” pêk tîne, parastina pêşeroja me ye.
YPJ, xeta sor a hemû jinên evîndarên jiyana azade. Li ser vê bingehê, ji Bakur heta Başûr, ji Rojhilat heta Ewropayê, ji Şengalê heta Mexmûrê, em bang li hemû gelê xwe û bi taybetî li jinan dikin ku piştgiriyê bidin vê kampanyaya hatiye destpêkirin. Sûcên ku çeteyên HTŞê li Rojava, Sûriye û Şengalê li dijî jinan kirine, divê werin belgekirin û bigihin hemû cîhanê û têkoşîna hiqûqî ya vê yekê were meşandin.
Em bang li ciwan, dayik, akademîsyen, hunermend, hiqûqnas, enternasyonalîst û her kesî dikin ku piştgiriyê bidin vê kampanyayê û di qadên xwe de bi xebat û çalakiyên cihêreng pirsgirêka xwebûn û xweparastina jinan bêtir xuya bikin.”
