Koma Amed piştî li Amedê konsera dîrokî da, li tenişta bazara gundan dar çandin.
Endamên Koma Amed, piştî konsera dîrokî û bi coş ku bi hevkariya Şaredariya Bajarê Mezin, Şaredariya Peyasê û Sanatça Organîzasyonê lidarxistin, li qadeke 12 donimî ya li tenişta Bazara Gundan a li Rêya Mastfiroşê dar çandin. Di çandina daran de Hevşaredarên Peyasê Bêrîvan Gulşen Sîncar û Cengîz Dundar, endamên meclîsa şaredariyê û endamên Koma Amedê beşdar bûn. Endamên komê piştî darên fêkî çandin, ji bo bîranînê şopa destên xwe li ser betonê danîn ku paşê wê li qada şîn bê hiştin.
Ev çalakî li qadeke şîn a ku ji aliyê Şaredariya Peyasê ve tê amadekirin, hat lidarxistin. Endamên Koma Amedê bi vê yekê xwestin hem xwezayê hem jî bîranîna hunerî dewlemend bikin. Hevşaredaran jî diyar kirin ku Koma Amed di dilê gelê Amedê de cihekî taybet digire û spasiyên xwe ji bo eleqeya mezin a li konsera piştî 30 salan pêşkêşî gel kirin.
Hevşaredaran gotin; “Xebatên me yên ku çand, huner û ekolojiyê tînin ba hev, wê bi biryardarî bidomin.” Ev çalakî wekî gaveke girîng a ji bo parastina xweza û hunerê li Amedê hate nirxandin.
