Mêrdîn – Parlamenterê DEM Partiyê George Aslan Konferansa Ol û Gelan de got : “PKKê û Tevgera Azadiyê bandorek erênî li ser têkiliyên Kurdan û Suryaniyan kir, her wiha pêvajoya Ocalan daye destpêkirin ji bo gelan fersendeke.”
Konferansa Jiyanek Hevpar û Demokratîk a Ol û Gelan li Mezopotamyayê ku ji aliyê Însiyatîfa Yekitiya Demokratîk ve tê lidarxistin û wê 2 rojan berdewam bike li Mêrdînê bi tevilbûna berdevkên însiyatîfê Gulcan Kaçmaz Sayyîgît û Mehmet Kamaç, hevşaredarên Bajarê Mezin ên Mêrdînê, gelek kesên ji ol, bawerî û gelên cuda tevlî konseransa li otelek taybet di rûniştina danê êvarî berdewam kir.
Di beşa duyemîn a konferansê de li ser mijara ji dîrokê heya niha di Mezopotamyayê de xwebûn û jiyana gelan û baweriyan berdewam kir. Li ser mijarê bi pêşkêşvaniya Parêzer Jiyan Abdussemedoglu Prof Dr. Nûrettîn Tûrgay, George Aslan, Perva Înal, Kadriye Dogan û Ender Peker axaftin kirin.
Xweziya Tevgera Azadiyê beriya 1950an ava bûba
Parlementerê Mêrdînê George Aslan ku Suryanî ye li ser di dîrokê de gelê Suryanî li Tirkiye çi jiyan kir axaftin kir. Aslan diyar kir k udi dîrokê de têkiliyên gele Kurd û Suryanî bi hev re xurt bûn û wiha axivî: “Her çiqas di navbera Kurd û Suryaniyan de têkiliyek erênî hebe jî lê bêbaweriyek hebû. Bi derketina holê ya Tevgera Azadiyê têkiliyên gelan xurt bûn û bandorek erênî çêbû. Xweziya beriya salên 1950an Tevgera Azadiyê hebûya ku ev têkilî ji zû ve xurt bûna.”
Em dikarin bi hev re bijîn
George Aslan di berdewama axaftina xwe de da zanîn ku gele Suryanî jî weke gelê Kurd êşên giran dîtine û wiha dirêjî da axaftina xwe: “Bi avakirina PKKê re di nava gelê me de jî guhertinek pêk hat û xwe rêxistinkirinek pêş ket. Her wiha gelê Suryanî dît ku di nava gelê Kurd de jî li hember wan guhertin çêdibe û ji hev re peyva ‘rêheval’ bikaranîn. Di pêvajoyên pêşde gelê Suryanî jî weke gelê Kurd êş kişand. Gundên wan jî hatin valekirin û koçber bûn. Li welatên Ewrûpa cardin têkilî bi hev re danîn. Îro cardin ji bo avakirina gundan xebatek bi hev re heye. Em dikarin bi hev re bijîn. Ev pêvajoya Ocalan daye destpêkirin ji bo gelên Tirkiyeyê fersendek mezin e.”
Divê her kes heqê hev biparêze
Piştî George Aslan, Prof Dr. Nûrettîn Tûrgay da zanîn ku ji bo gel hev re bikaribin bijîn divê ewil mafê hev biparêzin û wiha axivî: “Di baweriya Misilmantiyê de tişta herî girîng heq e. Heq navek ji navên Xwedaye. Ji bo ku em bikaribin bi hev re bijîn divê ewil em bikaribin mafê hev, heqê hev biparêzin. Divê ev ji bo heqê xwe yê mirovî li ber xwe bidin.”
Peymana Medîneyê maf û edalet esas digirt
Perva Înal Peymana Medîneyê ku di navbera şêniyên Mekkeyê û Medîneyê de hatiye pêk destnîşankirin bi bîr xist û wiha axivî: “Li gor vê peymanê jiyana hevpar tenê bi xweşbîniyê pêk nayê. Li gor Peymana Medîneyê bi hev re jiyan divê li ser rêgezên edalet û mafan pêk were. Ji bo jiyanek hevpar hewceyî bi baweriyek hevpar tuneye lê hewceyî bi edalet û mafên hevpar heye.”
Herî dawî Kadriye Doxan axivî û ev tişt gotin: “Pêvajoya Rêberê Gelê Kurd Abdullah Ocalan daye destpêkirin, pêşiyê li gelan û baweriyan vedike. Me weke elewiyan ji salên 1960an karî xwe bînin ziman. Li ji ber koçberbûnê û nebûna malên elewiyan pirsgirêk hatin jiyandin û dema elewiyan xwestin malên elewiyan vekin rastî tundiyê hatin. Em dibêjin divê elewî piştgiryê bidin vê pêvajoyê û xwe li dora vê pêvajoyê rêxistin bikin. Ji bo elewî bikaribin xwe bidin jiyandin modela herî pêkan modela Bakur Rojavayê Sûriyeyê ye.”
Piştî axaftinan pirs hatin kirin, bersiv hatin dayîn û hate ragihandin ku wê sibe encamnameya konferansê were aşkerekirin.
