Li gelek bajarên Bakurê Kurdistanê baranên biharê bi awaye zêdeyî berdewam dikin. Ji ber baranan li hind deveran hezaz û lêhî rabûn û di encamê de sewal, weayît û çandiniya welatiyan zirarên mezin dîtin.
Li bajarên Colemêrg û Sêrtê ji ber barana zêde, lehî û hezazê jiyan rawestiya. Li Colemêrgê gelek rêyên navçe û bajaran hatin girtin, li navçeya Misircê ya Sêrtê jî ji ber lehiyê bi dehan heywan telef bûn û xesareke mezin gihîşt wesayîtan.
Rê hatin girtin
Li Colemêrgê pirsgirêka veguhestin û çûnûhatinê, ji ber hezazên ku di rojên dawî de rû didin her ku diçe girantir dibe. Rêya di navbera Colemêrg û Wanê de nêzî hefteyek e ji ber hezazê girtî ye û welatî mexdûr in. Niha jî rêya di navbera Şemzînan û Rûbarokê de ji ber lehî û rabûna avan hate girtin.
Ji ber binesaziyê rê her sal tên girtin
Gelê herêmê destnîşan dike ku bi taybetî rêyên di navbera Colemêrg-Wan, Şemzînan, Gever û Çelê de her sal ji ber heman pirsgirêkên xwezayî û kêmasiya binesaziyê tên girtin. Xelkê bajar ji rayedaran daxwaza çareseriyên mayînde dike daku ev mexdûriyeta her salê bi dawî bibe.
Gelek sewal ber bi lehiyê ketin
Li aliyê din, li navçeya Misircê ya Sêrtê barana zêde veguherî lehiyê û bandoreke neyînî ya giran li jiyana welatiyan kir. Ji ber lehiyê bi dehan sewal mirar bûn. Çotkar û xwediyên sewalan ji bo ku sewalên xwe ji lehiyê xilas bikin, derxistin ser banê xaniyên xwe.
Wesayîtan ziyan dît
Li navenda navçeyê jî lehî bû sedema ziyana madî ya mezin. Bi dehan wesayîtên parqkirî û yên di rê de bi ber avê ketin, hin wesayît ji ber lehiyê kaş bûn û zirar dîtin. Tîmên rizgarkirinê û welatî hewl didin xesarên piştî lehiyê paqij bikin.
Li gelek bajaran bandora baranê didome
Li Bakurê Kurdistanê ku hêj li gelek deveran befr bandora xwe didomîne, li gelek deveran baranên zêde bandorek neyînî li ser jiyanê dike. Ji ber barana zêde bi taybetî cotkaran ziyanek mezin dît. Hilberînên wekî nîsk, nok û genim ji ber ava zêde riziyan.
Li gorî daneyên meterolojiyê nixte dê heta hefteyekê bi navber berdewam bikin.
