Rojnameger Nedîm Orûç ê ku ji ber şopandina çalakiyên protestoyî yên li dijî êrişên ser Rojava hatibû girtin, piştî sê mehan ji Girtîgeha Şirnexê hat berdan. Orûç piştî hat berdan bal kişand ser zextên rojnamegeriyê, girtiyên nexweş û zextên li ser girtiyên siyasî.
Nûçegihanê ajansa me Nedîm Orûç, di 14ê Çileyê de li taxa Nûr a Cizîrê di dema şopandina nûçeyê de bi lêdanê hatibû binçavkirin. Orûç ê ku zêdetirî sê mehan di girtîgehê de ma, di 24ê Nîsanê de biryara berdana wî hat dayîn. Orûç diyar kir ku hinceta girtina wî tenê şopandina nûçeyên li ser Rojava bûye û dewletê ev çalakiyên demokratîk wekî “sûc” nîşan daye.
‘Kurdistan yek parçe ye’
Nedîm Orûç destnîşan kir ku sînorên fîzîkî nikarin pêşî li hestên neteweyî bigirin û got: “Dibe ku Kurdistan bi fîzîkî bibe çar parçe, lê di rastiyê de her geşedaneke li herêmekê bandorê li her sê parçeyên din dike. Dema li Bakur ji bo Rojava çalakî dihatin kirin, me wekî rojnameger ev pêvajo dişopand. Lê karê rojnamegeriyê yê ku li hemû cîhanê rewa ye li Tirkiyê wekî sûc derdixin li pêşiya me.”
Li girtîgehan polîtîkayên taybet
Di berdewama axaftina xwe de Orûç bal kişand ser şert û mercên Girtîgeha Şirnexê û diyar kir ku li dijî girtiyên siyasî polîtîkayeke taybet a çewisandinê tê meşandin. Orûç diyar kir ku di dema hejmarê de gardiyan hewl didin hejmartina li ser piyan ferz bikin û dema girtî vê yekê qebûl nakin, bi zorê û tundiyê mudaxele li wan tê kirin. Orûç bal kişand ser rewşa girtiyên nexweş û got: “Dermankirina girtiyan nayê kirin. Li gorî prosedurên nû tenê 15 rojan carekê rê didin çûna li nexweşxanê. Hevalekî me yê ji ber êşa diranê xwe 10 rojan nikaribû xwarin bixwara, bi rojan nebirin nexweşxaneyê.”
Rojnamegerên girtî
Di dawiya axaftina xwe de Nedîm Orûç bal kişand ser hejmara rojnamegerên girtî û got ku niha zêdetirî 30 rojnamegerên Kurd di girtîgehan de ne. Orûç bang kir ku hemû hempîşeyên wî yên werin bên berdan û anî ziman ku ew ê bi biryardarî pênûsa li ser şopa heqîqetê li erdê nehêlin û karê xwe bidomînin.
