Serokê Giştî yê CHPê Ozgur Ozel li Wanê axivî û got: “Pirsgirêka Kurd heye.” Ozel têkildarî kongreya PKKê de jî destnîşan kir ku divê Meclis gavan biavêje.
Piştî girtina Şaredarê Bajarê Mezin a Stenbolê Ekrem Îmamoglu, CHPê her hefte li bajarekê miting li dar dixe. Mitînga vê hefteyê li bajarê Wanê hat lidarxistin. Serokê Giştî yê CHPê Ozgur Ozel beşdarî mitîngê bû û derheqê mijarên di rojevê de axivî.
Ozgur Ozel tayînkirina qeyûm a li Wanê rexne kir û diyar kir ku hurmet ji vîna gel re nehatiye girtin. Ozel bi bîr xist ku li şûna hevşaredarên ku di hilbijartinên 2019 û 2024an de li Wanê bi ser ketin qeyûm hatin tayînkirin û destnîşan kir ku ev pêkanîn dijminatiya li ser vîna gel û bi taybetî jî li ser hilbijêrên Kurd e. Ozel diyar kir bi hatina qeyûman re gelê Wanê hatiye mexdûrkirin.
Ozel da zanîn ku ji bo mirov tev li mitîngê nebin walî û qeyûm gef xwarin e û destnîşan kir ku gel li dijî hewldanên nedayîna mezbata hevşaredarên Wanê li ber xwe dabû.
‘Divê Meclis gavan biavêje’
Ozgur Ozel di berdewamiya axaftina xwe de got: “Pirsgirêka Kurd heye. Çareserî bi demokrasî û yekitiyê pêkan e.” Ozgur Ozel da xuyakirin ku pirsgirêka Kurd nayê înkarkirin û got ku divê ev pirsgirêk bi awayekî samîmî û şefaf li Meclisê bi awayek lihevkirineke civakî bê çareserkirin.
Ozel diyar kir ku divê sîstema qeyûman bi dawî bibe û girtiyên siyasî bên berdan. Ozel destnîşan kir ku ew piştgiriyê didin ev pêvajoya li Tirkiyeyê.
