Şirnex – Li Cizîrê Qada Seyrangehê ya Bajêr ji aliyê qeyim ve radestî Fermandariya Cendermeyan a Cizîrê hatibû kirin. Qada Seyrangehê di nava qirêjiyê de ye.
Li navçeya Cizîr a Şirnexê di navbera salên 2019 û 2024an de vîna gel hat desteserkirin û qeyim şaredarî bi rê ve dibir. Di vê serdemê de qeyim ji 22 parkên li bajêr 18 radestî saziyên dewletê yên weke Midûriyeta Polîsan, Midûriyeta Perwerdehiyê, Diyanetê û Fermandariya Cendirmeyan a Cizîrê kirin. Van saziyan jî bikaranîna van parkan bi îhaleyan dan kesên alîgir û nêzî xwe. Yek ji van parkan jî Qada Seyrangehê ya Bajêr e.
Cendirmeyan îhale daye alîgirê xwe û alîgir lê nanêre
Dema ku qeyim Qada Seyrangehê ya Bajêr radestî Fermandariya Cendermeyan a Cizîrê kir, fermandariyê jî ev der radestî Weqfa Malbatên Gazî û Şehîdên Mensûbên Cendirmeyê kir û weqfê jî ev der bi îhaleyê da kesekî alîgirê xwe. Lê kesê ev der radestî wî hatiye kirin ne paqijiya parkê dike ne jî daristanên li parkê ne av dide. Ji ber vê yeke Qada Seyrangehê ya Bajêr êdî ji aliyê welatiyan ve nayê bikaranîn. Welatiyên ku carna neçar dimînin werin qadê jî ji ber qirêj û kêmasiyên din bi gazinc in.
Mirov nikare têkeve parkê
Welatiya bi navê Fatma Çoban ku mêvanên xwe anîbûn geştê bertek nîşanî rewşa parkê da û wiha axivî: “Mêvanên min ji başûrê Kurdistanê hatine û min ew anîne geştê. Ji serî heta binî me cihek nedît em lê rûnin. Li vê derê ne cihê rûniştinê heye, ne av heye, her wiha cihê destavê jî di rewşek wisa de ye ku mirov nikare têkevê.”
Ev der di destê kê de be bila paqij bike
Fatma Çoban bang li rayedaran kir ku xwedî li vê devera ji bo gel hatiye çêkirin derkevin û got: “Serê sibê em hatine vir me nekariye em li vir nimêj bikin. Ev yek gelek eyb e. Bajarekî wekî Cizîrê bêxwedî ye. Ev der di destê qeymeqam de be, di destê leşkeriyê de be, di destê şaredariyê de be kî berpirsyar be bila xwedî lê derkeve. Ji ber çopê mirov bikare were vir.”
