Daraza rejîma Îranê yek jê jin bi giştî li 5 kesên ji heman malbatê ne, bi boneya beşdarê xwepêşandanan cezayên darvekirinê birî.
Malpera Dengê Binçavkiriyên Kurd û Îranî ragihand ku 26emin Dadgeha Şoreşê ya Tehranê bi serokatiya dadwer Îman Efşarî, cezayê darvekirinê li Bîta Hîmetî û hevserê wê Mihemed Reza Mecîdî, birayên wê Emîr Hîmetî, Bêhrûz Zemanî û Kuroş Zemanî Nejad birî.
Biryara hem darvekirin hem jî talanê
Li her 5 girtiyan jî bi boneya tevli xwepêşandanan bûne û li dijî yekîtiya dewletê derketine cezayê darvekirinê hate birîn. Her wiha biryara desteserkirina mal û milkên wan jî hate dayîn. Hêjayî bi bîr xistinê ye ku di biryarnameyê de tu belgeyeke yasayî û hûrgilî li ser tometên ku li wan hatine barkirin, nehatiye nîşandan.
Di bin îşkenceyê de îfade hat girtin
Hate diyarkirin ku girtî di dema lêpirsînê de ji bo wergirtina îtîrafên bi zorê, di bin zextên giran ên fîzîkî û derûnî de hatine hiştin, her wiha di tevahiya pêvajoya dadgehkirinê de ji mafê parêzerê serbixwe bêpar hatine hiştan. Ev şêwazê dadgehkirinê wekî binpêkirineke eşkere ya mafên mirovan û yasayên navneteweyî tê pênasekirin.
Hêjayî gotinê ye ku di 28ê Kanûna 2025an de, li bajarên cuda yên Rojhilatê Kurdistanê û Îranê xwepêşandanên girseyî destpê kirin û nêzîkî 22 rojan berdewam kirin. Xwepêşandan ji bo daxwazkirina mafên rewa yên gelan bûn, lê rejîma Îranê bi gulebaran, girtin û derxistina cezayên giran bersiva daxwazên welatiyan da.
