Hevserokê Giştî yê DEM Partiyê Tuncer Bakirhan di civîna Platforma Parastina Bajar û Piştevaniyê ya Amedê de anî ziman ku gelê kurd di mijara çareseriyê de jidil e û got: “Aliyê divê gav biavêje, îktîdar e.”
Hevdîtinên Platforma Parastina Bajar û Piştevaniyê ya Amedê di çarçoveya nîqaşên ser çareseriya demokratîk a pirsgirêka kurd de li Enqereyê hevdîtinan dike. Şandeya Platformê, di vê çarçoveyê de bi Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogûllari û Tuncer Bakirhan re hevdîtin kirin. Hevdîtin, li eywana civîna koma Meclisê hat lidarxistin. Parlamenterên DEM Partiyê jî tev li hevdîtinê bûn.
‘Divê civakê tev li pêvajoyê bikin’
Serokê Baroya Amedê Abdulkadîr Guleç anî ziman ku ew pêvajoyê erênî dibînin û wiha got: “Gelê Kurdistanê bihêvî ye lê bihişyarî nêz dibe. Weke rêxistinên civaka sivîl em jî bi baldarî nêz dibin. Em naxwazin ev pêvajo jî mîna yên berê bên tunekirin. Weke rêxistinên civaka sivîl em jî dixwazin hemû derdorên civakê tev li pêvajoyê bên kirin. Çareseriya pirsgirêka Kurd a bi rêyên diyalog, aştiyane û demokratîk daxwaza gel e.”
‘Dudilî heye’
Serokê DTSOyê Mehmet Kaya jî anî ziman ku li herêma me xweşbîniyeke dudil heye û wiha axivî: “Gel dixwaze şer xelas bibe û pirsgirêka kurd bê çareserkirin. Lê mixabin di serê gel de pirs hene. Divê muxalefet piştgiriyê bide, Meclis xwedî lê derkeve û civaka sivîl tê de cih bigire. Li gorî me divê ev meseleye li Meclisê û bi rêyên demokratîk were çareserkirin.”
‘Yê gava bavêje îktîdar e’
Hevserokê Giştî yê DEM Partiyê Tuncer Bakirhan jî anî ziman ku ew ji pêvajoyên berê dersan digirin û ji bo pirsgirêk bi rêyên demokratîk, diyalog û muzakereyan were çareserkirin, li parlamentoyê û derveyî parlamentoyê jî têkoşîna xwe didomînin û wiha got: “Em van nîqaşan girîng dibînin û hewl didin civakî bikin. Mîna we, em jî ji bo hemû dînamîkên civakê daxil bikin û ji bo veguhera pêvajoya çareseriyê, 24 saetan dixebitin. Divê pirsgirêka kurd bi rêyên muzakere û guftûgoyê were çareserkirin. Li gorî me aliyê Kurd di vê mijarê de jidil e. Ji bo vê jî tişta ji dest tê dike. Ya ku divê gavan biavêje û veguherîne pêvajoyeke aştiyê, îktîdar bi xwe ye. Em ji bo keda we spas dikin. Divê ji her çar aliyên welêt saziyên mîna we di vê mijarê de bên gel hev.”
‘Divê zemîna qanûnî hebe’
Hevseroka Giştî ya DEM Partiyê Tulay Hatîmogûllari jî di hevdîtinê de got: “Ji bo pirsgirêka Kurd bi rêyên demokratîk û aştiyane were çareserkirin, ev demekî dirêj e têkoşînek tê dayin. Ji bo ev pêvajo veguhera pêvajoya aştiyê weke DEM Partiyê em ê tişta ji dest tê bikin. Di demên berê de hinek kêmasî çêbûn. Divê zemîneke qanûnî hebe, meclis rola xwe bilîze û partiyên muxalefetê bi çalak tev li bibin. Wê demê dê aştiyeke mayinde çêbibe. Hem hevsengiyên herêmî hem jî yên navneteweyî aştiyê li me ferz diikn. Hêvîdarim her kes wisa binirxîne. Dê xebatên me yên bi rêxistinên civaka sivîl, rêxistinên ked û pîşeyî re bidomin.”
