Wezîrê Parastinê yê Amerîkayê Pete Hegseth, li Qesra Spî derbarê operasyonên li dijî Îranê de daxuyaniyek da. Hegseth destnîşan kir ku ev şer ji şerên berê yên li herêmê cudatir e û got: “Ev ne Iraq e, em ne di nav şerekî bêdawî de ne, em ji bo serkeftinê şer dikin.”
Wezîrê Parastinê yê Amerîkayê Pete Hegseth di civîna çapemeniyê de bal kişand ser armanca şerê Îranê û diyar kir ku hedefa wan a sereke rûxandina tesîsên nukleerî û binesaziya mûşekî ya Îranê ye. Wezîrê Amerîkî destnîşan kir ku ev gav ji bo parastina berjewendiyên Amerîkayê û hevalbendên wê tên avêtin û got: “Ev ne şerê guhertina rejîmê ye, armancên me zelal in.”
‘Me şer neda destpêkirin, lê em ê biqedînin’
Hegseth ragihand ku Îranê fersendên ji bo peymaneke aştiyane ji dest dane û wiha dewam kir: “Operasyon di çarçoveya stratejiya Donald Trump a ‘Pêşî Amerîka’ de tê meşandin. Dibe ku me ev şer neda destpêkirin, lê yê ku bi serkeftî biqedîne em in.”
Cudahiya ji Iraq û Afganistanê
Wezîrê Amerîkî cudahiya vê operasyonê û şerên bêdawî yên wekî Iraq û Afganistanê bi van gotinan anî ziman: “Em ne ji bo rastiya siyasî an jî avakirina demokrasiyê, lê tenê ji bo serkeftineke leşkerî li qadê ne. Ev helwesteke berevajî ji şerên berê ye.”
Hegseth piştrast kir ku di van sê rojên dawî de di şerê li dijî Îranê de 4 leşkerên Amerîkî jiyana xwe ji dest dane û gelek leşker jî birîndar bûne.
