Platforma Ked û Demokrasiyê ya Amedê têkildarî erişên Amerîka û Îsraîlê yên li dijî Îranê li Amedê civîna çapemeniyê li dar xist. Platformê diyar kir ku çareserî pergaleke demokratîk e ku gel karibin bi awayekî wekhev û azad bijîn û ev bang kir: “Em bang li hemû gelên herêmê dikin ku di têkoşîneke hevpar de werin cem hev.”
Platforma Ked û Demokrasiyê ya Amedê têkildarî erişên Amerîka û Îsraîlê yên li dijî Îranê li avahiyê Şaxa Egîtîmsenê ya Hejmara 1an a Amedê ya li navçeya Yenîşehîr a Amedê civîna çapemeniyê li dar xist. Endam û rêveberên Platforma Ked û Demokrasiyê tev li daxuyaniyê bûn. Di daxuyanî yê de pankarta “Ne Rejîmên Kujer û Yekperest Ne Jî Êrişên Metînger Bijî Vîna Jiyaneke Azad a Gelan” hate daliqandin. Metna daxuyaniyê ya bi Tirkî ji aliyê Hevseroka Şaxa Genel Îşê ya DÎSKê ya Hejmara 2yan a Amedê Sabahat Sever ve hate xwendin.
‘Polîtîkayên şer zirarê herî giran dide sivîlan’
Sabahat Sever ê anî ziman ku bi fikarî çavdêriya êrîşên Amerîkayê û Îsraîlê yên li dijî Îranê û rewşa şer a ku li Rojhilata Navîn kûr dibe, dikin û wiha got: “Em bi awayekî aşkere dijberiya xwe ya li dijî her destwerdaneke leşkerî ya ku dê gelên herêmê bikişîne nav wêrankariyeke mezintir, radigihînin. Bi salan e, Rojhilata Navîn bûye qada şerê destwerdanên emperyalîst, şerên wekaletê û têkoşînên hêzên herêmî. Polîtîkayên êrîşkar ên ku bi giranî ji aliyê Amerîkayê û Îsraîlê ve tên meşandin, ne aştiyê û ewlehiyê, lê belê xizanî, bêîstiqrarî û mirinê ji gelên herêmê re tînin. Lêbelê, helwesta me tenê bi dijberiya destwerdanên derve sînordar nîne. Em her wiha rejîma Mollayan a li Îranê red dikin, ku desthilatdariya xwe bi rêya polîtîkayên zordestî, komkujî û cudakariyê li dijî nasname û baweriyên cuda, bi taybetî li dijî gelê Kurd, diparêze. Sîstemeke rêveberiyê ku daxwazên demokratîk ên gelê xwe tepeser dike, bi tundiyê li dijî têkoşîna jinan a ji bo azadiyê derdikeve. Polîtîkayên şer zirara herî giran dide sivîlan.”
‘Em ê li dijî emperyalîzmê bisekinin’
Di berdewama axaftiana xwe de Sabahat Severê diyar kir ku ew weke Platforma Ked û Demokrasiyê, dizanin ku çareseriya rastîn û mayînde ya ji bo Rojhilata Navîn ne di destwerdanên emperyalîst de ye ne jî di polîtîkayên tepeserker ên rejîmên otorîter de ye û ev tişt gotin: “Çareserî sîstemeke demokratîk e ku tê de gel dikarin bi hev re di nav wekhevî û azadiyê de bijîn, ku tê de bawerî û nasname tên garantîkirin û mafên jinan û mafên mirovan tên naskirin. Çareserî di avakirina sîstemeke civakî de ye ku gel bikaribin di nav birêveçûneke wekhev, azad û demokratîk de bi hev re bijîn. Em bang li hemû gelên herêmê dikin ku ji bo aştiyê li dijî şer, dagirkerî û polîtîkayên zordestiyê di têkoşîneke hevpar de werin cemhev. Em bi rêzdarî ji raya giştî re radigihînin ku em ê li dijî emperyalîzm, mîlîtarîzm û otorîteriyê, û di parêzvaniya wekhevî, azadî û demokrasiyê de helwesta xwe bidomînin.”
