Amed – Jinan bi çarçoveya çalakiyên 8ê Adarê Roja Jinan a Cîhanê de duh li Amedê bafirok firandin. Jinên ku tev li çalakiyê bûn destnîşan kirin ku ew ê berxwedana xwe bidomînin û wiha gotin: “Divê em jin têkoşîna xwe bilind bikin, her tim li cem hev bin û piştgiriyê bidin hev.”
Platforma Jinan a Dîcle Amedê di çarçoveya çalakiyên 8ê Adarê Roja jinan a Cîhanê de duh li Çiyayê Kirklar yê li navçeya Sûrê ya Amedê bafirok firandin. Nûnerên sazîyên sivîl yên jin, endamên komeleyên jinan û gelek kes tev li çalakiyê bûn. Jinan di çalakiyê de bafirokên ku wêneyên keziyên hunandî li ser firandin û anî ziman ku bafirok sembola derbaskirina sînoran e û li dijî qedexeyan nîşaneya mezinkirina hêvî û azadiyê ye. Nesrîn Moral û Yasemîn Paçras ku tev li çalakiya firandina bafiroka bûn têkildarî 8ê Adarê ji ajansa me re axivîn.
‘Em ê berxwedana xwe bidomînin’
Xebatkara Şaredariya Bajarê Mezin a Amedê Nesrîn Moral dîroka derketina 8ê Adarê bi bîr xist û wiha got: “Ev roj ji wê demê heta îro wekî rojeke têkoşînê, wekî hêviyekê tê dîtin. Em vê jiyanê wekî têkoşînekê dibînin. Ev berxwedan ji wê rojê heta îro berdewam dike. Îro jî ev berxwedan dê bi awayekî zêde dewam bike. Çimkî dema ku em dibêjin pergala hevserokatiyê; ji destpêkê, ji komunên jinan bigire heta îro, berxwedan û xebata jinan berdewam kiriye. Îro jî em ê berxwedana xwe bidomînin.”
‘Em hêvî dikin ku em ê di qonaxên pêş de bêtir serbikevin’
Nesrîn Moral da zanîn ku piştî heft-heşt salan Meclisa xwe ya jinan ava kirin û wiha domand: “Di nava xebatê de, gava firsend dihat dîtin, me Meclisa jinan dida xebitandin. Jin pêş diketin; perwerde û akademî dihatin dayîn. Yanî hevalên me yên ku dixwestin bi pêş ve biçin, me dixwest bi her awayî alîkariya wan bikin. Em dixwazin jin her tim bi biryar bin û em ê piştgiriya xwe ya ji bo wan her tim bidomînin. Em hêvî dikin ku em ê di qonaxên pêş de bêtir serbikevin.”
‘Jin hewl didin mafên xwe bi dest bixin’
Xebatkara Şaredariya Bajarê Mezin a Amedê Yasemîn Paçras jî destnîşan kir ku 8ê Adarê ji bo jinan rojeke geleke taybet e û wiha bi lêv kir: “Roja Jinan a Cîhanê ye. Ev bi hezar salan e, têkoşînek e ku jin li dijî pergalê, li dijî zilma dewletê û zîhniyeta baviksalariyê didin. Ev têkoşîneke pîroz e û jin bi vî rengî hewl didin mafên xwe bi dest bixin.”
‘Em ê têkoşîna xwe mezin bikin’
Di berdewamiya axaftina xwe de Yasemîn Paçras anî ziman ku jin her tim hewl didin ku hebûna xwe îspat bikin û ev tişt gotin: “Em dixwazin ev tundî, ev neheqî û qetlîamên li ser jinan bi dawî bibin. Jin jiyan e; dema ku jin tune be, ne malbat dibe, ne civak dibe, ne jî jiyan dibe. Ji ber vê yekê divê em her tim li mafên xwe xwedî derkevin û têkoşîna xwe bilind bikin. Em jin divê her tim li cem hev bin û piştgiriyê bidin hev.”
