Denîz Poyraz a ku di 17ê Hezîrana 2021an de li Îzmîrê hatibû kuştin, li ser gora xwe hat bibîranî. Berdevka Meclisa Jinan a DEM Partiyê ya Îzmîrê Turkan Aslan Agaç li ber gora Denîz Poyraz axivî û got: “Dê nikaribin bi gule, nefret û bi êrîşan rê li ber tevgeran jinan bigirin.”
Meclisa Jinan a Partiya Wekhevî û Demokrasiyê ya Gelan (DEM Partî) ya Îzmîrê, bi minasebeta 8ê Adarê Roja Jinan a Cîhanê, Denîz Poyraz a ku di sala 2021an li avahiya partiyê ji aliyê kujer Onur Gencer ve hatibû kuştin, li ser gora wê bi bîr anî. Di serdanê de malbata Denîz Poyraz, Dayikên Aştiyê, aktîvîstên Tevgera Jinên Azad (TJA) û gelek welatî amade bûn. Di bîranînê de bênavber dirûşmeyên “Şehîd namirin” û “Jin, jiyan, azadî” hatin berzkirin.
‘Em bi têkoşîna wan serbilind in’
Dayika Denîz Poyraz, Fehime Poyraz di destpêka axaftina xwe de 8ê Adarê li keça xwe û hemû dayikan pîroz kir û got: “Bila dayik êşên xwe bînin ziman; îro gelek ciwanên me di bin axê de ne. Em bi têkoşîna wan pir serbilind in. Hêviya min ew e ku ji niha û pê ve jiyan xweşiktir û baştir bibe. Ez Roja Jinan a Cîhanê li hemû jinan pîroz dikim.”
Piştre Berdevka Meclisa Jinan a DEM Partiyê ya Îzmîrê Turkan Aslan Agaç axivî û diyar kir ku ew ji bo bîranîna Deniz Poyraz û hemû jinên ku di oxira azadiyê de jiyana xwe ji dest dane li vir in û destnîşan kir ku zihniyeta kujer îradeya jinan dike hedef û got: “Jiyana Denîz Poyraz nîşanî me da ku têkoşîna azadiya jinan di heman demê de têkoşîna demokrasî, aştî û azadiyê ye. Heya jin azad nebe, civak azad nabe. Bila her kes zanibe; ev têkoşîn ne bi guleyan, ne bi nefretê û ne jî bi êrîşan têk diçe. Em ê li ser şopa Denîz û hemû hevalên xwe yên şehîd bin. Têkoşîna wan rêya me ronî dike û em soz didin ku em ê ala azadiyê li her derê bilind bikin.”
