Amed – Bi nêzikbûna cejna Newrozê re, li dikanên terziyan ji bo dirûna û kirîna cilên neteweyî jî tevgereke mezin heye. Xwediyên dirûnxaneyên cil û bergên Kurdî anîn ziman ku divê gelê Kurd di Newrozê de cilên xwe yên neteweyî li xwe bikin û qada Newrozê bixemilînin.
Cejna Newrozê ku her sal di 21ê Adarê de tê pîrozkirin, li cem dirûnxaneyan jî ji bo kirîn û çêkirina cil û bergên neteweyî jî tevgereke girîng çêdibe. Li dirûnxaneyên cil û bergên neteweyî ango Kurdî cilên wek kiras, fistan, şal û şapik tên çêkirin. Dirûnxane ji bo gihandina sîparîşên Newrozê bênavber dixebatin. Xwediyên dirûnxaneyan têkildarî amadekariyên Newrozê axivîn.
‘Em ji bo Newrozê amadekariyan dikin’
Dikandarê bi navê Yemlîxan bi bîr xist ku Cejna Remezanê û Cejna Newrozê bi hev re nêzîk dibin û wiha got: “Lê belê ji ber şerê li Îranê gel hinekî bi fikar e û wekî berê daxwazeke mezin tune ye. Berê Newroz gelekî xweş û geş bû. Lê niha mirov hinekî bi fikar in. Digel vê yekê jî, gelê me ji bo Newrozê amadekariyan dike. Em vî karî ji bavo û kalên xwe ve dikin, ez ji nifşê duyemîn im. Ev deh sal in ez li vê çarşiyê cil û bergên neteweyî difiroşim. Ev panzdeh sal in ez vî karî dikim. Li vir dikaneke min heye. Min ev cil û bergên neteweyî û şal û şapik ji bo firotanê anîne. Malbata me ev pêncî sal in di nav vî karî de ye; çi kiras-fistan be, çi jî şal û şapik be, em bi dehan salan e van kincên neteweyî amade dikin. Ev kar ji bo me ne tenê bazirganî ye, mîrateyeke çandî ye.”
‘Ji bo cil û bergên Kurdî daxwazek zêde heye’
Ronahî Surme ya ku dirûna cil û bergên neteweyî dike diyar kir ku ew pirr ji karê xwe hez dike û xwest gelê Kurd xwedî li çanda xwe derbikeve û wiha got: “Ez ji bajarê Îzmîrê hatime li vir. Me dikanên xwe bi van cilan xemilandine, çimkî pêşiya me Newroz e. Em dixwazin daxwazên gelê xwe pêk bînin. Em hem cilan didin kirê, hem jî difiroşin. Ev cil û bergên Kurdî ne û daxwazeke baş ji bo wan heye. Em dixwazin daxwazên gelê xwe, bi taybetî daxwazên jinan ên ji bo modelên nû, pêk bînin. Tevî hemû zehmetiyan, eleqeya gelê me ya ji bo çanda xwe me gelekî kêfxweş dike.”
‘Divê em xwedî li çanda xwe derbikevin’
Dikandar Elanur Baylan jî destnîşan kir ku xelk pirr tê û eleqeyeke mezin nîşanî cil û bergên neteweyî dide û wiha got: “Dema ku ez dibînim ew van cilan li xwe dikin, ez pir kêfxweş dibim. Bi rastî, ez van cilan zêde li xwe nakim, lê dema ez dibînim her kes li xwe dike û bi kelecan e, daxwaza min jî çêdibe ku ez li xwe bikim. Ez dixwazim gelê me cilên xwe yên herêmî û kevneşopî her tim li xwe bikin û xwedî li çanda xwe derkevin. Em bi vê çandê mezin dibin û em dixwazin berdewam be.”
