Rêxistina DEM Partiyê ya Stenbolê li navçeyên Beyoglu, Bagcilar, Sultanbeylî û Kagithaneyê agirê Newrozê geş kir û daxwaza azadiya Rêberê Gelê Kurd Abdullah Ocalan hate kirin.
Newroz îsal bi dirûşmeya “Azadî û yekîtiya demokratîk” tê pîrozkirin. Gel bi coş tevli Newrozê dibe. Li Stenbolê jî Newroz bi coş tê pîrozkirin. Rêxistina DEM Partiyê ya Stenbolê li navçeyên Beyoglu, Bagcilar, Sultanbeylî û Kagithaneyê pîrozbahiyên Newrozê li dar xist. Li her çar navçeyan de bi hezaran kes tevli pîrozbahiyê bûn.
Li Bagcilarê gel li rêya meşê kom bûn, bi gerandina govendê Newrpz pîroz kir. Hevserokê DEM Partiyê yê Stenbolê Çinar Altan, Dayikên Aştiyê û gelek kes tev li pîrozbahiyê bûn. Gel di govendê de dirûşmeya “Newroz pîroz be” berz kir.
Paşê jî di şexsê Salih Muslum de ji bo tevahî cangoriyên Kurdistanê rêz girt. DI pîrozbahiyê de wêneyên Salih Muslim hate vekirin.
‘Azadî bi azadbûna Rêberê Gelê Kurd dê pêk were’
Hevserokê DEM Partiyê ya Stenbolê Çinar Altan di pîrozbahiyê de axivî û got: “Em di rojên xemgîn de derbas dibin. Şehadeta Salih Muslim me xemgîn kir. Em ê bi agirê Newrozê bi ser bikevin. Newroza îsal Newroza azadiyê ye, azadî jî bi azadbûna Rêberê Gelê Kurd dê pêk were.”
Paşê agirê Newrozê hate pêxistin. Ciwan li ser agir xwe avêtin.
Pîrozbahî bi gerandina govendê bi dawî bû.
