Qersî tevî berfa dibarî li Qada Newrozê kom bûn û bi coşeke mezin pîrozbahî li dar xistin.
Newroza 2026an bi dirûşma “Azadî û Yekitiya Demokratîk” tevî şert û mercên hewayê yên neguncav li gelek navendan tê pîrozkirin. Bajarê Qersê yê Serheda Jor yek ji van bajaran bû.
Qersî Qada Stasyonê ya ji bo pîrozbahiyên Newrozê hatiye veqetandin kom bûn. Gel saetên sibê berê da li qada pîrozbahiyan. Welatî bi cilên kesk, sor û zer qada Newrozê xemilandin. Girseya ku bi piranî ji ciwan û jinan pêk dihat, bi govend û diruşman bernameya Newrozê dan destpêkirin. Tevî ku pileya germê di bin sifrê de bû û berf dibarî jî Qersî guh nedan serma û berfê, bi coşeke mezin pîrozbahiyên Newrozê domandin.
Pîrozbahî piştî rêzgirtinê û axaftinên siyasetmedar û endamên komîteya amadekar ên Newrozê dest pê kirin.
‘Berxwedana Kurdan ji cîhanê re dibe îlham’
Parlementerê DEM Partiyê yê Agiriyê Heval Bozdag, Konseya Hevserokatiyê ya PYDê Salih Muslim bi bîr anî û diyar kir ku ew ê têkoşîna wî mezintir bikin. Heval Bozdag bal kişand ser kevneşopiya Newrozan û ev tişt gotin: “Bila agirê Newrozê Rojava, Rojhilat û çar parçeyên Kurdistanê hilde nava xwe. Bila Kurd deh salên xwe yên bên, bi azadî û têkoşînê bidomînin. Kurdan li dijî zordarên her serdemê, li ber xwe dane û îro jî berxwedana xwe didomînin. Ev berxwedan ne tenê ji bo gelên Tirkiye an jî Rojhilata Navîn e, ji bo hemû gelên cîhanê dibe îlham. Em ji Qersê ji her derê ku agirê Newrozê lê bilind dibe silav dişînin.”
Piştî axaftinan, hunermend Cevdet Bagca derket ser dikê. Cevdet Bagca bi strîna stranên xwe yên bi Tirkî û Kurdî coşa Qersiyan bilind kir.
Pîrozbahî bi stran û gerandina govendan bi dawî bû.
