Partiya Herêmên Demokratîk (DBP) bertek nîşanî sansura AVA TV a li ser wêneyên Rêber Gelê Kurd Abdullah Ocalan da û got: “Ev nêzîkatî hedefgirtina nirxên neteweyî yên gelê Kurd e.”
Koma Mediya AVA ya ku ji Başûrê Kurdistanê xebatên xwe dimeşîne, di weşana xwe de wêneyên Rêberê Gelê Kurd Abdullah Ocalan sansur kir. Li ser vê yekê Partiya Herêmên Demokratîk (DBP) daxuyaniyeke nivîskî belav kir û diyar kir ku ev nêzîkatî hedefgirtina nirxên neteweyî yên gelê Kurd e.
‘Polîtîkayên ku çand, ziman, nasname û nirxên neteweyî hedef digrin’
Di daxuyaniyê de hat diyarkirin ku di vê pêvajoya ji bo çareseriya aştiyane û demokratîk de, ev nêzîkatî nayê qebûlkirin û wiha hat gotin: “Em vê nêzikatiya ku li ser wêneya Birêz Ocalan pêk hat, wekî polîtîkayên ku çand, ziman, nasname û nirxên netewî yên gelê Kurd hedef digrin, dibînin.”
‘Ji yekitiyê re xizmetê nakin’
DBPê bal kişand ser hedefgirtina îradeya gel û wiha pê de çû: “Divê neyê jibîrkirin ku; feraseta ku Birêz Ocalan hedef digre û îradeya wî tune hesab dike, li gel hedef girtina nirxên Kurdistanî, li dijî heqîqeta civakî û dîrokî ya gelê Kurd e. Ev helwesta saziyeke çapemeniyê ku qaşo xwe wek ‘Kurdistanî’ dide nasîn, ji yekitiyê re xizmetê nake.”
‘Wek pratîka Judenratê bal dikşîne’
Di daxuyaniyê de bal kişandin ser pîvanên çapemeniyê û wiha gotin: “Ev pêkanîna ku nirx û pîvanên azadiya çapemeniyê jî binpê dike, em dikarin encax wek ‘ji dijmintiya Kurd re xizmet’ pênase bikin. Nêzîkatiyeke bi vî rengî di heman demê de wek pratîka ‘Judenratê’ bal dikşîne.”
‘Demildest dev ji vê helwesta înkar û sansurê berdin’
Di dawiya daxuyaniyê de bang li rayedarên Koma Medya AVA hat kirin: “Wek DBPê em bang li rayederên vê saziya çapemeniyê dikin ku; demildest dev ji vê helwesta înkar û sansurê berdin. Ev nêzikatiya ku rûmet û îradeya gelê me hedef digre divê demildest bi dawî bibe û divê ev yek wek berpirsyarî bê dîtin.”
