Li gorî nûçeyeke rojnameya The Times ku dispêre belgeyeke dîplomatîk ya îstîxbarata Amerîka û Îsraîlê, Rêberê Bilind yê nû yê rejîmê Mucteba Xameney bêhiş maye û di komayê de ye.
Li gorî nûçeya The Timesê; belgeya dîplomatîk ku bi welatên Kendavê re jî hatiye parvekirin, eşkere dike ku Mucteba Xameney li bajarê pîroz yê Şîayan li Qûmê, di bin dermankirinê de ye. Hat ragihandin ku rewşa wî pir giran e û nikare beşdarî biryarên rêveberiya rejîmê bibe. Her çend rayedarên Îranê dibêjin ew li ser karê xwe ye, lê ji destpêka şer û vir ve tu dîmen an dengê wî nehatiye weşandin. Ev rewş dibe sedema valahiya desthilatdariyê û pirsên li ser kîjan hêz welat birêve diçe, zêdetir dibe.
Gelo kontrol Îranê di destê pasdaran de ye?
Mucteba Xameney piştî ku bavê wî Elî Xameney di 28ê Sibatê de di êrişa DYA û Îsraîlê de hat kuştin, hatibû ser desthilatê. Lê tê gotin ku ew bû çend hefte ne nikare welat birêve bibe. Ev yek gumanan zêde dike ku niha kontrola de facto ya Îranê di destê Pasdarên Şoreşê yên Rejîma Îranê (IRGC) de ye.
Gumanên li ser merasîma veşartinê
Paşxistina merasîma fermî ya veşartina Elî Xameney jî pirsên nû derdixe pêş. Her çend Tehran dibêje merasîm ji ber qerebalixiyê hatiye paşxistin, lê li gorî adabên Şîayan divê mirî zû were veşartin. Di belgeyê de tê gotin ku li Qûmê ji bo Xameney û malbata wî amadekariyên mezela mezin (turbê) têne kirin.
Bajarê navenda nû ya desthilatdariyê Qumê
Bajarê Qûmê di pêvajoya diyarkirina cîgirê Xameney de bûye navendeke krîtîk. Di destpêka Adarê de, dema ku Civata Pisporan ji bo hilbijartina rêber diciviyan, avahiya wan li Qûmê ji aliyê Îsraîlê ve hatibû lêdan. Ev yek nîşan dide ku şerê desthilatdariyê û şerê leşkerî li heman navendê dicivin.
