Ji bo endamê HPGê Mehmet Dogan (Dilxwaz Gabar) ê ku di sala 2022yan de li Silêmaniyê jiyana xwe ji dest dabû, mewlûd hat dayîn.
Li gundê Bafê yê navçeya Hezexa Şirnexê ji bo endamê HPGê Mehmet Dogan (Dilxwaz Gabar) ku di sala 1990î de tev li Tevgera Azadiyê bûbû û 21ê Gulana 2022yan li navçeya Çemçemal a Silêmaniyê jiyana xwe ji dest dabû ji aliyê malbata wî ve mewlûd hat dayîn. Parlamentera DEM Partiyê ya Şirnex Newroz Ûysal Aslan, endam û rêveberên MEBYA-DERa Şirnexê, endam û rêveberên DBPê û DEM Partiyê yên Şirnexê û gelek welatî tev li mewlûdê bûn.
Mewlûda ku li mala malbata Mehmet Dogan hate dayîn bi xwendina duayan dest pê kir û piştre Parlamenter Newroz Ûysal Aslan axivî.
Newroz Ûysal Aslan destpêkê di kesayeta hemû cangoriyên Tevgera Azadiyê de sersaxî ji malbatê re xwest û wiha got: “Xeyalên şehîdên me hemûyan azadî û tifaqa gelê Kurd bû. Îro encax bi tifaqa her çar parçeyên Kurdistanê em dikarin bigehin serkeftinê. Ji gundên xwe heya bajaran, ji bajaran heya her çar parçeyên axa xwe divê em tifaqa xwe pêk bînin ku em xeyalên cangoriyan pêk bînin.
Piştî axaftina Newroz Ûysal Aslan, mewlûd hat xwendin û xwarina mewlûdê hat dayîn û mewlûda bi xwedina duayan bi dawî bû.
