Tîmên gerok ên tenduristiyê yên Hevya Sor a Kurd li gundewarên Dêrik û Qamişloyê xizmeta tenduristiyê dan welatiyan û derbarê bergiriyên nexweşiyan de agahî dan.
Tîmên klînîkên gerok ên Heyva Sor a Kurd, xebatên xwe yên mirovî û tenduristiyê li herêmên Dêrik û Qamişloyê bê navber didomînin. Di vê çarçoveyê de tîman serdana gundên Girkê Legê kirin û xizmeta tenduristiyê pêşkêşî bi dehan welatiyan kirin.
Hem dermankirin hem jî hişyariya tenduristiyê
Tîmên saziyê çûn gundên Dukerkê û Til Cemal ên girêdayî navçeya Girkê Legê û li wir muayeneya 70 nexweşan kirin. Di nava xizmetên ku ji aliyê tîman ve hatin pêşkêşkirin de; muayeneyên bijîşkî yên beşa hundirîn û nexweşiyên zarokan cih girtin. Her wiha, bi armanca pêşîgirtina li nexweşiyên şewbê, ji bo şêniyên her du gundan derbarê nexweşiya xuriyê de semînerên hişyariyê hatin dayîn.
Çavkaniyên avê hatin venêrandin
Ji bilî xizmetên muayene û tedawiyê, tîmên tenduristiyê çavdêriya kalîte û çavkaniyên ava herêmê jî kirin daku rê li ber nexweşiyên ku ji avê derbas dibin, bigirin. Heyva Sor a Kurd diyar kir ku ji bo misogerkirina mafê gihîştina xizmetên tenduristiyê û bilindkirina hişmendiya civakî, ew ê xebatên xwe yên ji bo gihîştina civakên herî hewcedar û mexdûr bidomînin.
