Şaredariyên DEM Partiyê ji bo maça Amedspor û Igdirsporê ya ku dê roja Şemiyê were lîstin, li gelek navendan ekranên mezin deynin ku gel bikaribe maçê bi hev re temaşe bike.
Tîma Amedsporê di hefteya dawî ya Lîga 1emîn a Trendyolê ya TFFê de 2yê Gulanê roja Şemiyê saet di 16:00an de dibe mêvanê Igdirsporê. Ev hefte ji bo çûyîna nav Lîga Superê ji bo Amedsporê gelek girîng e. Heke ku Amedspor, Igdirsporê têk bibe dê rasterast derbasî Lîga Superê bibe. Ji bo vê maça krîtîk gelek şaredariyên DEM Partiyê ragihandin ku ew ê li eywan, qad û parkên bajêr ekranên mezin deynin ku hezkirî û alîgirên Amedsporê bikaribin maçê bi hev re temaşe bikin.
Cihên ku dê ekranên mezin lê werin danîn ev in:
AMED
Şaredariya Bajarê Mezin a Amedê: Meydana Bajêr û Park Orman
Şaredariya Erganiyê: Bazara Girtî ya TOKÎyê
Şaredariya Bismilê: Parka Kardeşlîkê
Şaredariya Farqînê: Meydana Bajêr a li kêleka Birca Saetê
MÊRDÎN
Şaredariya Nisêbînê: Parka Barişê
Şaredariya Dêrikê: Meydana Şaredariyê
Şaredariya Mazîdaxê: Meydana Cumhuriyetê
ŞIRNEX
Şaredariya Cizîrê: Pişta Mala Mamosteyan (Qada Îtfaiyeyê)
Şaredariya Silopiyayê: Qada Newrozê
WAN, COLEMÊRG Û MÛŞ
Şaredariya Elbakê: Salona Konferansê ya Şaredariyê
Şaredariya Geverê: Parka 15ê Tîrmehê
Şaredariya Gimgimê: Meydana Gimgimê
Li bendê ye ku roja Şemiyê bi hezaran alîgirên Amedsporê li ber van ekranên mezin li maçê temaşe bike.
