Endama KNKê Nilufer Koç têkildarî niqaşên konferansa li Romayê pêk hat bal kişand ser helwesta beşdaran û got: “Baweriya beşdaran bi dewleta Tirk tune ye. Lê baweriya wan bi Rêber Apo heye.”
Di 11-12ê Nîsanê de li paytexta Îtalya Romayê Konferansa Navneteweyî ya bi navê “Ji Abdullah Ocalan re azadî, ji pirsgirêka Kurd re çareseriya siyasî” pêk hat. 360 nûnerên partiyên siyasî, sendîka, rêxistinên jinan û ekolojiyê, parêzer, rêxistinên hiqûqî, çalakvanên aştiyê, endamên Meclisa Parlamenteran a Konseya Ewropayê, akademîsyen, rojnamevan, oldar, doktor û navendên civakî yên ji welatên weke Ewropa, Efrîqa, Amerîka Latîn, Asya, Misir, Tirkiye û Kurdistanê hatin beşdar bûn.
Beşdarên konferansê banga “Aştî û Civaka Demokratîk” a ku di 27ê Sibatê de ji aliyê Rêberê Gelê Kurd Abdullah Ocalan ve hate kirin, bi kêfxweşî pêşwazî kirin û piştgirî dan. Beşdarên konferansê bêbersiviya dewleta Tirk a ji bo banga Abdullah Ocalan û agirbesta yekalî ya PKKê weke metirsiyeke cidî dîtin û fikarên xwe anîn ziman. Beşdaran pêla girtina şaredar, rojnamevan, parêzer û aştîxwazan a li Tirkiyeyê bi awayekî eşkere rêbaza otorîter a hikûmeta Tirkiyeyê pênase kir û fikarên xwe yên li dijî Tirkiyeyê anîn ziman. Beşdaran li dijî êrîşên artêşa Tirkiyeyê yên li ser çeperên tevgera azadiyê û bikaranîna çekên kîmyewî fikarên xwe anîn ziman. Delegeyan di konferansê de encamên erênî yên di du salên dawî yên kampanyayê de derketine holê bi berfirehî nîqaşkirin û destnîşan kirin ku kampanyaya bi gelek çalakiyên siyasî, hiqûqî û civakî pêk hat, rê li ber zextên siyasî yên li ser Konseya Ewropa, CPT û hikûmeta Tirk vekir.
Beşdaran anîn ziman ku azadiya Ocalan ji bo çareseriya siyasî ya pirsgirêka Kurd şertek pêwîst e û ev yek wê rê li pêşiya pêvajoya demokratîkbûna Tirkiyeyê veke. Beşdaran xwest ji bo ku hikûmeta Tirkiyeyê rê li pêşiya azadiya fizîkî ya Abdullah Ocalan veke, divê zextên siyasî yên li ser hikûmetên Ewropayê derkevin lûtkeyê û bên bihêzkirin. Beşdaran xwest bi pêşengiya sendîka û tevgerên civakî yên berfireh ên li paytextan, kampanya “Ji Ocalan re azadî, ji pirsgirêka Kurd re çareseriya siyasî” di 1ê Îlonê Roja Aştiyê ya Cîhanê de bibe Roja Çalakiya Kurevî. Beşdaran xwest ji bo azadiya Abdullah Ocalan konser û semîner bên lidarxistin û herî dawî xwestin ku Abdullah Ocalan ji bo Xelata Nobelê ya Aştiyê weke namzet bê nîşandan.
Tirkiye qanûnên navneteweyî binpê dike
Têkildadarî niqaşan û encamê Endama Konseya Kongreya Neteweyî ya Kurdistanê (KNK) Nilufer Koç nirxandin kir. Nilufer Koç, anî ziman ku ev konferans ji aliyê tora navneteweyî ya “Azadî ji bo Abdullah Ocalan, çareserî ji bo pirsgirêka Kurd hat amadekirin û got: “Dema di 10ê Cotmeha 2023an de pêngavê dest pê kir, ev tor hat avakirin. Ev dor dixwaze di aliyê hiqûqî de gav bên avêtin û agahiyê ji rewşa Rêber Abdullah Ocalan bigire. Pisporên hiqûqnas tev li konfransê bûn û li ser mafê heviyê nirxandin kirin. Destnîşan kirin ku Tirkiye di aliyê mafê heviyê de qanûnên navneteweyî binpê dike. Li ser fikrên Rêber Apo yên der barê azadiya jinê, ekolojiyê, ciwanan, civaka demokratîk de niqaş kirin û hemû erênî nêzî fikrên Rêber Apo bûn. Ji Asya, Ewropa, Amarîkaya Latîn û gelek welatên din beşdarî konferansê bûn. Bi piranî fikrên Rêber Apo erênî dîtin. Destnîşan kirin ku fikrên Rêber Apo ji bo wan hemûyan e.”
Rêxistinên civakî yên Ewropa ji Dewleta Tirk bawer nake
Nilufer Koç, da zanîn ku di nava tora vê kampanyayê de sendîkavan, rêxistinên civakî hene û wiha berdewam kir: “Tevgerên niştecih, sendîka, partiyên siyasî û rêxistinên qada civakî hebûn. Hemûyan plansaziyên xwe yên ji bo azadiya Rêber Apo anîn ziman. Herî zêde gotin ‘Em ji dewleta tirk bawer nakin’ ev nerîn zêde derket pêş. Tevan fikarên xwe yên li dijî qeyûman, girtina siyasetmedaran, êrîşên bi çekên kîmyewî anîn ziman. Tevan destnîşan kirin ku ev helwesta Tirkiyeyê fikarên wan zêde dikin.”
Dê çalakiyên kurevî pêş bixin
Nilufer Koç, herî dawî li ser encamê ji rawestiya û wiha got: “Beşdaran destnîşan kirin ku têkoşîna wan a pêngavê bandorek li ser siyasetê çêkir û xwestin ve têkoşîn û pêngavê xurttir bikin. Destnîşan kirin ku gerdûnîbûna vê kampanyayê li ser Konseya Ewropa û Tirkiyeyê zextek çêkir. Kesên xelata Nobelê girtibûn jî peyam ji bo konferansê şandibûn. Beşdaran dan zanîn ku baweriya wan ji Tirkiyeyê nayê û xwestin têkoşînê zêde bikin. Biryar girtin ku di 1ê Îlonê de kampanya çalakiyên kurevî bidin destpêkirin. Konser û semîneran pêş bixin. Dîsa biryar girtin ku ji bo Rêber Apo endamtiya rûmetê bê dayîn û her welat wî wekî endamê rûmetê bibîne. Pêşniyar kirin ku Rêber Apo ji bo xelata Nobelê bê pêşniyarkirin. Plansaziya hevpar jî hebûn û her komek plansaziyên wan ên xweser jî hebûn. Ji niha û şûnde ji bo azadiya fizîkî dê xebatên hiqûqî, siyasî, civakî û dîplomasî bimeşînin. Di konferansê de xwestin biçin Tirkiyeyê û Rêber Apo bibînin.”
Nilufer da zanîn ku ev konferans dê bandoreke erênî çêke û wiha bi dawî kir: “Di vê qonaxê de Şandeya Îmraliyê diçe cem RêberApo û hikûmetê. Lê dîsa li dijî dewletê guman heye. Ji ber ku destnîşan dikin ku heta niha dewletê tu gav neavêtiye. Bes baweriya beşdarên konferansê ji Rêber Apo heye. Diyar dikin ku çalakiya wan bandor li ser şikandina tecrîdê kir. Ji ber vê yekê dixwazin têkoşîna xwe xurtir bikin., Destnîşan kirin ku ji fikrên Rêber Apo sûdê digirin û fikrên Rêber Apo ji bo wan jî derman û ronahî ye. Destnîşan kirin ku ne tenê ji bo gelê kurd, ji bo xwe jî azadiya fizîkî ya Rêber Apo dixwazin.”
