Şirnex – Şîrovekarê siyasî Alî Oremar bi lêv kir ku piştî çekdanîna komeke endamên PKKê pêvajoya çareseriyê derbasî qonaxeke nû dibe û wiha got: “Pêvajo bi yek alî nameşê pêwîstê piştî vê gava PKKê avetiyê Tirkiye jî gavekê biavêje.”
Bi banga “Aştî û Civaka Demokratîk” a Rêberê Gelê Kurd Abdullah Ocalan pêvajoya çareseriyê derbasî merheleyekê bû û PKKê jî ji bo piştgiriya bangê biryara fesixkirina xwe ji raya giştî re aşkera kiribû. Komeke endamên PKKê piştî biryara fesixkirinê amadekariyên çekan û danînê dikin. Tê payîn ku di rojên pêş de komeke endamên PKKê dê li başûrê Kurdistanê çekan bişewitînê. Çavê rayagiştî ya çar aliyên Kurdistanê û dinyayê jî li başûrê Kurdistanê û geşedanên li wir diqewimine. Di nava van geşedanan de Serokê MÎTa Tirkiyeyê Îbrahîm Kalin jî serdana başûrê Kurdistanê û Iraqê kir û hin hevdîtin pêkanîn. Tê payin ku piştî şewitandina çekan a ji aliye endamên PKKê ve dê pêvajoya çareseriyê jî derbasî merhaleyeke nû bibe.
Şîrovekarê siyasî Alî Oremar ku li başûrê Kurdistanê geşedanan ji nêz ve dişopînê derbarê rewaşa dawî ya herêmê û pêvajoya hatiyê destpêkirin de ji Ajansa Welat (AW) re axivî.
‘Pêvajo derbasî qonxeke nû dibe’
Alî Oremar anî ziman ku bi çekdanîna komeke endamên PKKê pêvajoya çareseriyê wê derbasî qonaxeke nû bibe û ev tişt gotin: “Di navbera PKKê û Tirkiyeyê de pêvajoya çareseriyê ber bi encameke nû ve diçe. Piştî peyama birêz Abdullah Ocalan PKKê jî kongreya xwe ya 12emîn li dar xist û biryara fesixkirinê ragihand. Helbet ev pêvajo girêdayî geşedanên di Rojhilata Navîn de diqewimin pêşket. Pêvajoya aştiyê qonaxên baş derbas kiriye. Niha jî amadekariya çekberdana komeke gerîlayên PKKê tê kirin. Tê payîn ku ev yek dê di van rojan de pêk were. Piştî vê gavê bêguman çavdêrî hene ku dewlet jî pêngavekê biavêje û pêvajo bikeve merheleyeke nû. Ev geşedan di asta cihanê de bandoreke mezin dikin. Her wiha banga birêz Abdullah Ocalan jî dengek mezin veda. Diyar bû ku gelê Kurd çawa girêdayî Serokê xwe ye. Di vê pêvajoyê de başûrê Kurdistanê jî roleke mezin dilîze. Heke tu astengî dernekevin pêvajo wê derbasî qonaxeke nû bibe. Têkoşîna çekdarî jî wê derbasî têkoşîneke siyasî û demokratîk bibe.”
‘Divê lêşkerên Tirkiyeyê li herême vekişin’
Di berdewama axaftina xwe de Alî Oremar bal kişand ser serdanên Serokê MÎTa Tirkiyeyê Îbrahîm Kalin a li Başûr û Iraqê û wiha pê dê çû: “Serokê MÎTa Tirkiyeyê Îbrahîm Kalin serdana başûrê Kurdistanê û Iraqê kir û hin hevdîtin pêkanîn. Di vê qonaxê de helbet peywendiyên wan jî wê hebin. Danîna çekan wê bandoreke çawa bike û ew çek wê radestî kê bên kirin, rola Iraqê wê çi bibe. Ji bo wê jî Îbrahîm Kalin hin hevdîtin pêkanîn. Tirkiyeyê heta niha PKKê weke hincet nişan dida û bi zêdeyî 80 baregeh û navendên çekdarî li başûrê Kurdistanê ava kirin. Piştî pêvajoya aştiyê bi pêş ket rewşa wan wê çi bibe. PKKê amade ye çekên xwe deyne. Heke gefa çekê li ser dewleta Tirk tune be divê Tirkiye jî hezên xwe vekişîne. Ji ber wê rola Iraqê jî di vê pêvajoyê de girîng e. Divê dewleta Iraqê jî rola xwe bilîzê û piştî çekdanîna PKKê ji Tirkiyeyê re bêjin divê lêşkerên Tirkiyeyê vekişin sînorê Tirkiyeyê. Niha jî guftûgoyên vê yekê tên kirin. Serdana Îbrahîm Kalin jî bi vê yekê ve jî giredayîye. Ya girîng piştî çekdanîna komeke gerîlayên PKKê dê dewlet çi bike. Pêvajo bi dû alî dimeşe bi yek alî nameşe. Divê dewlet jî gavekê biavêje.”
‘Welatî û partiyên Başûr piştgiriya pêvajoyê dikin’
Alî Oremar diyar kir ku welatiyên herême û partiyên siyasî eleqeyeke mezin nişan didin û piştgiriya pêvajoye dikin. Alî Oremar destnîşan kir ku di vê pêvajoyê de yekitiya partiyên Kurd pir girîng e û wiha axivî: “Raya Giştî ya başûrê Kurdistanê jî piştgiriya pêvajoyê dike lê fikarên wan jî hene. Ji ber ku gelek caran dewleta Tirkiyeyê di pêvajoyê de bi paş ve gav avetiye û astengî derxistine. Bendewariya rayagiştî ya başûrê Kurdistanê jî ew e ku pêvajo encam bigire û êrişên Tirkiyeyê yên li ser herême jî raweste. Beriya 2 rojan jî Tirkiyeyê çoltara Amediyê topbaran kir. Tevî ku zêdetirî meheke ku PKKê biryara fesîhê girtiyê û piştgiriya pêvajoya aştiyê kiriyê jî êrişên Tirkiyeyê ranewestiya ne. Partiyên siyasî yên Başûr jî piştgiriya pêvajoyê dikin û li bendê ne ku kongreyeke netewî ya Kurd pêk were. Ji bo zêdetir bandor li ser pêvajoyê bikin û destkeftiyên Kurd.”
‘Pêdiviya Kurdan jî ya Tirkiyeyê jî aştiyê heye’
Alî Oremar bi lêv kir ku divê Tirkiyeyê jî ji bo bi pêş ve çûna pêvajoyê gavan biaveje û axaftina xwe wiha bi dawî kir: “Piştî biryara fesixkirinê ya PKKê dronên dewleta Tirkiyeyê li ser herême kêm bûn lê êrişên Tirkiyeyê bi temamî ranewestiyan. Lê diyarê rayedarên Tirkiyeyê jî dixwazin pêvajoya aştiyê bi pêş ve biçe. Taybet piştî van bûyerên dawî ku çend lêşkerên Tirk di tunelan de mirin jî ji aliyê rêyedarên Tirkiyeyê ve bertekeke tund nehat nişan dan. Ew jî diyar dike ku çawa ku pêdiviya Kurdan ji aştiyê heye ewqas jî pêdiviya Tirkiyeyê jî aştiyê heye. Heke pêvajo bi pêş bikeve ji bo Tirkiyeyê jî baş e û ji bo destkêftiyên Kurdan jî baş e. Ji ber wê jî her dû aliyan jî pêdivî bi pêşketina aştiyê heye. Lê heta niha Tirkiye gaveke erênî neavetiyê. Divê ji niha şûn ve Tirkiye jî gavên erênî baveje. Helbet ya herî girîng jî divê Kurd di vê pêvajoyê de yekitiya xwe ava bikin û piştgiriyeke xurt bidin pêvajoyê.”
