Amed – Nûner û rêveberên DFGê, MGK û Dîsk-Basin-Îş û gelek rojnamegeran, Rojnameger Kadrî Kaya di 7emîn salvegera wî de li ser gora wî bi bîr anîn. Nûnerê Basin-Îşê Hakki Boltan anî ziman ku Kadrî Kaya mamoste û rûmeta wan e.
Nûner û rêveberên DFGê, MGK û Dîsk-Basin-Îş û gelek rojnamegeran, di 7emîn salvegera dilovaniya Rojnameger Kadrî Kaya de li ser gora wî kom bûn û ew bi rêzdarî bibîr anîn. Kadrî Kaya di 29ê Cotmeha 2018an de li Nexweşxaneya Zaningeha Egeyê ya Îzmîrê dema tedawî dibû jiyana xwe ji dest da. Di salvegera wî dê, heval û hempîşeyên wî yên rojnameger, endamên malbatê û dostên wî li ser gora wî ya Goristana Yenikoyê kom bûn û ew bibîr anîn. Bîranîn bi deqîqeyek rêzgirtinê destpê kir. Piştî rêzgirtinê Hevserokê YEW-KURDê û rojnameger Hakki Boltan Kadrî Kaya bi rêzdarî silav kir û got: “Mamoste Kadrî ji bo me ne tenê rojnamegerek bû. Ew pêşengê rojnamegeriyê bû em minetdarin. Di nûçeyên xwe de, jiyana xwe de di her tiştî de şopê wî dibînin.”
Paşê Edîtora Ajansa Mezopotamyayê rojnameger Dîcle Mûftûoglu jî bal kişand ser jiyana Kadrî Kaya û got: “Mamoste Kadrî ji bo hemû kesan mamoste bû. Ew hem mamosteyê rojnamegeriyê û hem jî bi sekna xwe mamosteyê jiyanê bû. Ew hem rêheval û hem jî mamosteyê heqîqetê bû. Em soz didin ku em ê her tim li ser şopa mamoste Kadrî bimeşin û têbikoşin.” Piştî axaftinan, hevalên wî yên rojnameger qurnefil u gul danîn ser gora wî. Bîranîn piştî guldanîna ser gorê bi dawî bû.
