Berdevka DEM Partiyê Aysegul Dogan derbarê civîna Desteya Rêveberiya Navendî ya DEM Partiyê de bi lêv kir ku têkildarî berdana girtiyên doza Kobanê geşedaneke nû tune ye ew jî li bendê ne ku bên berdan û derbarê çûyina komîsyonê ji bo Girava Îmraliyê jî destnîşan kir ku divê komîsyon hevdîtina bi Abdullah Ocalan re dereng nexîne.
Berdevka Partiya Wekhevî û Demokrasiyê ya Gelan (DEM Partî) Aysegul Dogan derbarê civîna Desteya Rêveberiya Navendî (MYK) de li navenda giştî ya partiya xwe daxuyanî da. Ayşegul Doganê tekildarî encama civîna Desteya Rêveberiya Navendî û geşedanên di rojevê de anî ziman ku wan gelek mijarên di rojevê de ne nîqaş kir û wiha got: “Demeke dirêj e civînan li dardixînin. Dûh me careke din bi binçavkirina rojnamegeran dest bi rojevê kir. Lê xwestin ku ew wekê ne binçavkririn e nîşan bidin. Ew jî nîşan dide ku siyaset bandoreke çawa li ser hiqûqê dike. Divê ew sepanên li dijî demokrasiyê bi dawî bibin. Em ê parastina demokrasiyê û mafê wergirtina agahiyan a gel biparêzin û di nava piştgiriyê de bin.”
Ayşegul Doganê balkişand ser biryara Dadgeha Mafê Mirovan a derbarê Selahattîn Demirtaş û doza Kobanê û wiha axivî: “Ew doz dozeke tolhildanê bû, dozeke siyasî bû û bi hiqûqê ve tu alaqaya xwe tune bû. DMEyê jî wisa biryar da. Lê ew qas dem derbas bû û hevalên hê di girtîgehê de ne. Divê gavên ku hiqûqê pêkbînin bên avêtin. Em jî li bendê ne. Wazereta Dadê li ser pirsa rojnamegeran got em li bendê ne ku dosya were dadgeha herêmî, lê çend roj derbas bû hevalên me hê nehatinê berdan. Li benda çi ne. Li benda çi ne em nizanin lê ya ku divê li bendê bin pêkanîna hiqûqê ye. Avakirina aştî û demokrasiyeke civakî jî bi pêkanîna hiqûqê çêdibe. Em jî li bendê ne ku hevalên me demildest bên berdan.” Ayşegul Doganê di berdewama axaftina xwe de navê siyasetmedarên di Doza Kobanê de girtînê bi lêv kir û got ku ne tenê girtiyên di Doza Kobanê hemû girtiyên siyasî divê ben berdan.
Çûyina Komîsyonê li Girava Îmraliyê
Ayşegul Doganê tekildarî çûyîna komîsyonê ji bo Grava Îmraliyê û hevdîtina bi Rêberê Gelê Kurd Abdullah Ocalan re jî ev tişt gotin: “Dema komîsyon nû hat damezrandin jî me got komîsyonek tenê nikarê barê pêvajoyê hilgire lê dikarê rê vebike. Komîsyonê mîsyoneke dîrokî hilgirt. Piştî guhdarkirinan dikare raporên taslaxên qanûnî amade bike û xebatên xwe bi dawî bike. Heta niha gelek beşên civakê hatin guhdarkirin. Temsiliyeta meclisê jî di komîsyonê de pêkhatiye. Divê gavên taslaxa qanûnî pêk werin. Ji ser biryara fesixê ya Rêxistinê re 9 meh derbas bûn. Li ser şewitandina çekan re 5 meh derbas bûn. Çend roj berê jî rêxistinê gaveke dîrokî avet û got me hezên xwe li bakurê Kurdistanê vekişandine. Divê ji aliyê dewletê ve jî gavên şênber bên avêtin. Serokê MHPê Devlet Bahçelî jî got divê komîsyon biçe Îmraliyê, Serokkomar jî got divê hemû alî bên guhdar kirin. Partiyên muxalîf jî gotin bila biçe. Lê çima komîsyon vê mijara ku hemû kes tînin ziman nanirxîne û plansaziya çûyinê nake? Birêz Ocalan ne tenê Serokê PKKê ye. Di derfetên sînorkirî de Birêz Ocalan li ser rêbaza wekheviyê pêvajoyekê dimeşîne. Heta hûn muxatabê sereke guhdar nekin pêvajo pêş ve naçe. Divê siyaset bi wêrekî tevbigere. Em careke din bang dikin ku komîsyon vê mijarê bigre rojeva xwe û çûyina Girava Îmraliyê dereng nexîne. Dem dema çûyina girava Îmraliyê, bi dawîkirina pevçûnan û gavên sereke yên qanûnî ye. Em li vir yên ku manşetên, ‘Bila komîsyon neçe Îmraliyê’ davêjin jî hişyar dikin ku zerarê nedin pêvajoyê, ev nêzikatî ji hemû Tirkiyeyê dide windakirin.”
Budçeya Sala 2026an
Ayşegul Doganê li ser pêşniyariya Budçeya sala 2026an jî destnîşankir ku ew budçe ne budçeya jin û gelan e û wiha pê de çû: “Me jî dixwast ew budçe bibe budçeya gelan û gel jê sûd bigrin lê mixabin wisa nebû. Ew budçe bêedaletiya heyî didomîne. Partiya me jî kampanyaya bi navê Ji Bo Nan û Aştiyê kampanyayek daye destpêkirin û ji bo budçeya gel pêk were xebatên me didomin. Em ê dîsa li qadan daxwazên xwe bînin ziman. Em ê ji bo ku budçeya jinan, karkeran, ciwanan, karmendan û hemû gelan pêk were têkoşîna xwe bidomînin.”
Berdana girtiyên doza Kobanê
Ayşegul Doganê li ser pirsa çima komîsyon xebatên xwe hêdî dimeşîne û hevdîtina bi Rêberê Gelê Kurd Abdullah Ocalan re dereng dixîne jî destnîşankir nabe ku komîsyon ji muxatebê sereke re hevdîtinê pêk neyne. Ayşegul Doganê got divê şert û mercên Abdullah Ocalan jî bên guherandin û di şert û mercên azad de xebatên xwe bidomîne. Ayşegul Doganê li ser pirsa berdana girtiyên Doza Kobanê jî destnîşankir ku ew li benda mizginiyekê ne û divê hiqûq jî dereng nexîne û biryara berdana girtiyên ji Doza Kobanê pêkbîne. Ayşegul Doganê da zanîn ku derbarê berdana Selahattîn Demirtaş û girtiyên ji Doza Kobanê de geşedaneke nû û tiştekî ku ji wan re hatiyê gotin tune ye û ew jî li bendê ne û daxwaz dikin ku hevalên wan bên berdan.”
