Rojnameya Xwebûnê di hejmara xwe ya 308emîn de bi manşeta “Jin bajaran ji nû ve saz dikin” derket.
Rojnameya Xwebûnê di hejmara xwe ya 308emîn de bi manşeta “Jin bajaran ji nû ve saz dikin” gihişt ber destê xwînerên xwe. Rojnameyê, di vê hejmara xwe de îlana bajarên jinan ên wekî Amed, Nisebîn, Cizîr, Artemêt û Gever derxistiye manşeta xwe. Rojname li ser vê mijarê bi hevşaredara Bajarê Mezin a Wanê û hevseroka GABBê Neslîhan Şedal re der barê armanca îlankirina van bajaran de hevpeyvînek pêk anî ye. Neslîhan Şedal di vî derbarê de ji rojnameyê re wiha axivî: “Bajar bi hişmendiya zilamtiyê ve tên birêvebirin. Di nav wan bajaran de ji bo jinan û ji bo kesên ku hez bikin li gorî pîvanên exlaqî û polîtîk bijîn, cih tune ye. Tekiliya jinan a bi civakê re, ya bi jiyanê re û bi taybetî ya bi zilaman re hatiye qutkirin. Bi avakirina van bajaran ve qirkirina jinan, ya xwezayê, ya civakê û di heman demê de ya jiyanê dest pê kiriye. Li hemberî vê jiyana bêwate divê ku bajar dîsa bi aqil, ruh û nêrîna jinan bên avakirin.”
Her wiha di hejmara vê hefteyê de nivîskar Mizgîn Ronak, Bihar Kobanê, Arslan Ozdemîr, Feratê Dngizî, Serdar Altan, Felemez Ulug, Ramazan Olçen, Cahîd Kirkazak, Xeyrî Welat Serhed, Ahmet Aktaş, War Botan, Mihemed Kurdî, Mehmet Şahîn, Kewê Redkan, Abdullah Ongullu Şêrwî, Rohat Bulut, Veysî Aydin û Mûsa Şanak, bi nivîsên xwe di rojnameyê de cih girtin.
Dîsa rojname, bi nûçe û analîzên xwe bi dosya û nivîsên xwe ji mijarên jinan, siyasî, polîtîk, çandî, zimanî, wêjeyî, qerfî û civakî bigire gelek mijarên girîng dibîne. Li aliyê din bi xebatên lêkolînî û zanistî bi gelek mijarên girîng bala xwîneran dikişîne.
