Amed– Parlementerê DEM Partiyê yê Wanê Mahmut Dîndar destnîşan kir ku projeyên hêzên emperyalîst li ser Rojhilata Navîn tên zanîn û got “Ev şerê ku li Rojhilata Navîn diqewimin, em bêjin li Filistin, Lubnan, Sûreye, Iraq û Îranê; çareseriyê, aştiyê di navbera gele kurd û tirk de ferz dike.”
Di 28ê Kanûna 2024an de heyeta Partiya Wekhevî û Demkokrasiyê ya Gelan (DEM Partî) ya ku ji Sirri Sûreya Onder û Pervîn Bûldanê pêk dihat çû Girtîgeha Tîpa F a Îmraliyê û bi Rêberê PKKê Abdullah Ocalan re hevdîtin kir. Heyetê rojek şûn de di 29ê Kanûnê de peyamên Rêberê PKKê Abdullah Ocalan bi daxuyaniyekî bi raya giştî re parvekir. Rêberê PKKê Abdullah Ocalan di peyamên xwe da bal kişandibû ser şerê li Rojhilata Navîn û mudaxeleyên hêzên emperyalîst û gotibû: “ Ji bo serkeftina pêvajoyê divê hemû derdorên siyasî yên Tirkiyeyê, hesabên xwe yên biçûk û demkî daynin aliyekî û bibin xwedî înîsiyatif.” Peyamên Rêberê PKKê Abdullah Ocalan di nav gelê kurd û hêzên aştîxwez û demokratîk de hêvî û baweriya çareserî û serkeftinê xurtir kir. Nîqaş û nirxandinên li ser peyamên Rêberê PKKê Abdullah Ocalan jî berdewam dikin.
Gelê kurd ji bo aştiyê amade ye
Parlementerê Partiya Wekhevî û Demkokrasiyê ya Gelan (DEM Partî) yê Wanê Mahmut Dîndar têkildarî peyamên Rêberê PKKê Abdullah Ocalan ji Ajansa Welat re axivî. Mahmut dîndar diyarkir ku gelê kurd ji bo aştiyeke bi rûmet amadeye û got “Hûn dizanin di demeke nêzîk de li gel birêz Abdûllah Ocalan hevdîtinek pêk hat. Ev hevdîtin ji bo ku pirsgirêka kurd a ku sed salin dewam dike were çareserkirin girîng e. Di pêvajoya 2013yan de gelek kêmasî çêbûn mixabin çi kêmasiyên me çi yên dewletê, ew pêvajo bi awayekî serkeftî bi encam nebû. Ji ber vê jî dîsa dilê gelek dayikên me şewitî, zarokên me, gelê me hatin kuştin. Niha jî her çiqas mirov nikaribe jê re bibêje pêvajoyeke nû jî lê gavek hat avêtin. Gelê me, siyaseta me bi salan e ji bo aştiyeke bi rûmet amadeye. Wan jî gavek avêt, destê xwe dirêj kir, me jî destê wan li hewa nehîşt. Ev şerê ku li Rojhilata Navîn yên ku li Filistin, Lubnan, Sûreye, Iraq û Îranê pêş dikeve; çareseriyê, aştiyê di navbera gele kurd û tirk de ferz dike. Ji ber vê me jî got rêya aştiyê, berbirsyarê aştiyê diyar e. Ji bo aşitiyê pêwist e hûn destê kê bigrin diyar e. Ew jî Îmrali ye. Li ser vê Dewlet Bahçelî jî daxuyanî da û got “ Bila heyeta DEM Partiyê biçe Îmraliyê, bila Ocalan bê meclîsê biaxive.”
Divê dewlet û hikûmet gavan bavêjin
Mahmut Dîndar destnîşan kir ku Abdullah Ocalan gotiye ‘Ez ji bo ku aştiyeke bi rûmet pêk were amademe’ û wiha berdewam kir: “Birêz Abdullah Ocalan di hevdîtinê de fikrên xwe berfireh anîne ziman û dibêje; ez amademe, bes dewlet, hukumet gavên pêwîst bavêje, ji bo ku aşitiyeke bi rûmer di nav gelê kurd û tirk de pêk were çi bikeve ser milên min ez ê jî pêk bînim. Tabî îro êdî rol û mîsyon dikeve ser milê dewlet û hukumetê ku gavan bavêje, em jî van gavan bi çavên xwe bibînin ku gelê me jî êdî bawer bike ku rêya aşitiyê vebûye, ev 50 salin qetlîamên ku li ser gelê me pêktên dê bêne sekinandin û jiyaneke wekhev û aşitiyeke bi rûmet dê bê avakirin. Ji bo vê jî divê êdî dewlet bi şiklekî exlaqî, bi cesaret gavên pêwîst bavêje, ev him daxwaziya hemû siyasetmedarên me, parlementerên me ye, him daxwaziya gelê me ye. Ev daxwaz çi ne; divê êdî tecrîd li ser Serok bê rakirin, Serok bi awayekî fîzî li gel gelê xwe be, bi gelê xwe re, rêxistina xwe re baştir bikaribe rol û mîsyona xwe ji bo aşitiyê baştir pêk bîne.”
Gelê kurd bi tu awayî serî natewîne
Mahmût Dîndar diyarkir ku ev sed salin hêzên emparyalîst Dewleta Tirk her cure zilim û zordestî li ser gelê kurd meşandiye û wiha bi dawî kir: “Niha gelê kurd êdî hatiye asteke wisa bi tunehesibandinê, bişaftinê, kuştinê, qetlîaman ne tune dibe ne jî serê xwe ditewîne û çong datîne. Ji bo vê jî êdî mecbûriye aştiyek bê avakirin. Ev mafê gelê kurd e. Sed sal berê gelê kurd bi Peymana Lozan ji aliyê hêzên emperyalîst ve hat parçekirin, tune hat hesibandin. Lê ev pêncî sal in em bi awayekî herî bi rûmet, bi berdêlên giran têdikoşin ji bo welatê xwe, ji bo azadiya xwe. Êdî pêwîst e gelê kurd jî bi awayekî azad , bi rûmet jiyana xwe berdewam bike.”
