Hevserokê DEM Partiyê yê Êlihê Mûstafa Mesût Tekîk ê ku salek berê ji ber qeyrana dil jiyana xwe ji dest dabû, li ser gora xwe bi girseyî hate bibîranîn.
Bi pêşengiya Partiya Wekhevî û Demokrasiyê ya Gelan (DEM Partî) ya Êlihê bi boneya salvegera mirina Hevserokê DEM Partiyê yê Êlihê Mûstafa Mesût Tekîk ê ku salek berê ji ber qeyrana dil li Stenbolê jiyana xwe ji dest dabû hate bibîranîn. Rêvebêr û endamên DEM Partiyê û DBP, Komeleya Dayikên Aştiyê, Komeleya 78an, Aktîvîstên TJAyê, MEBYA-DER, TUAY-DER, ARÎ-DER, DÎAY-DER, Navenda Çandê ya Baharê (BKM), Karkerên Sendîkaya Patrol Îşê û gelek saziyên civaka sivîl ên bajêr li goristanê bûn. Pêşî ji bo kesên ku di têkoşîna azadiyê de jiyana xwe ji dest dane deqeyek rêz hate girtin û piştre dûa hatin xwendin. Girse qurnefîlan danîn ser gorê û find hatin vêxistin.
Rêveberê DEM Partiyê yê Êlihê mele Beşîr Erol ewil ser saxiyê ji malbatê re xwest û wiha axivî: “Di baweriya me ya olî de hin kes di asta şehîdan de ne. Kesên ku bi agir, av, welatên xerîb û kesên ku bi êşa dil diçin ew kes dikevin asta şehîdan. Hevalê me Mûstafa rehma xwedê lê be, hem bi êşa dil û hem jî li welatekî xerîb çû. Ne di nava malbata xwe de û ne jî di nava heval û hogirên xwe de bû. Hevalekî ku bi salan bû di nava têkoşînê de cih girt. Em dibêjin serê malbatê sax be cihê wî bihuşt be.”
‘Bi salan ji bo aştî û heqîqetê têkoşiya’
Hevseroka DEM Partiyê ya Êlihê Semra Guneş jî sersaxî ji malbatê re xwest û got: “Em beriya her tiştî hevalê xwe bi rêzdarî bi bîr tînin. Hevalê me Mûstafa salek berê ji nava me koç kir û çû. Ew hevalê me yê têkoşînê bû. Em îro ji bo bîranîna hevalê Mûstafa hatine gel hev. Hevalê me bi salan ji bo aştî û heqîqeta vî welatî têkoşiya. Ji qada kedê heta qada siyasî her tim li cem rastiyê bû.”
‘Hê jî êşa wî weke ya roja ewil e’
Xwişka wî, Dîcle Mesût Tekîk jî kekê xwe bi bîr anî û ev tişt got: “Îro salvegera kekê min e, hê jî êşa wî weke ya roja ewil e ji bo me. Hemû hevalên hêja û bi nirx me bi tenê nehiştin û xwedî li nirxên ku wî jê bawer dikir derketin. Em spasiyên xwe ji her kesî re dikin ku îro me bi tenê nehiştin û hatine sersaxiyê. Hûn hemû bi ser seran û ser çavan re hatine, mala we ava be.”
‘Heta ku ew ‘roj bê’ em ê têbikoşin’
Herî dawî Sekretera Yekîtiya Demokratîk Songul Korkmaz a ku bi Mûstafa Mesût Tekî re hevserokatiya DEM Partiyê ya Êlihê kiribûn axivî û wiha got: “Me hev re nêzîkî sal û nîvekê peywir girt, kar û xebat da meşandin. Li hember sekn, têkoşîn û keda wî em çiqas gotinan bêjin dê bêwate bimîne. Ez ê ji niha pê ve barê ku te daye ser milê min weke du kesan bixebitim. Ez li vir careke din dîsa soza xwe nû dikim, heta em sax bin ew xewn û xeyalên ku te digot; ‘Wê roj bê’ heta ku ew roj bê em ê têbikoşin.”
Bîranîn dîsa bi danîna qurnefîlan a li ser goristanê bi dawî bû.
