Li Êlihê bi hezaran kes di çarçoveya banga serferberiyê ya Rêveberiya Xweser a Rojava de kom bûn û banga mezinkirina têkoşînê û parastina destkeftiyên Rojava kir.
Bi pêşengiya Platforma Saziyên Demokratîk, li Êlihê bi hezaran kes li ser bangawaziya seferberiya neteweyî ya Rêveberiya Xweser a Bakur Rojhilatê Sûriyê hatin cem hev. Girseya li ber Peykerê Mafên Mirovan a Kolana Gulitanê kom bû, bi berzkirina dirûşm û çepikan piştgiriya xwe ya ji bo Rojava nîşan dide. Girseya xwest dest bi meşê bike rastî astengiya polîsan hat.
Gel di meşê de bi israr e
Li ser astengiya polîsan girseyê bi çepikan berteka xwe nîşan da. Parlementerê DEM Partiyê yê Êlihê Mehmet Rûştî Tiryakî axaftinek kir û astengiya polîsan şermezar kir. Ji ber ku destûra meşê nehate dayîn girse di kuçeyan cuda da herikî û bi sloganan dest bi meşê kir. Polîsan bi şideta êrişî girseya di meşê de kir û hewil da ku pêşiya komê bigire.
Di encama êrişa polîsan de rageşiya li nav kolanan de berdewam dike û beşek girseyê jî li Kolana Gulistanê di bin dorpêça polîsan de çalakiya xwe didomîne.
