Gelê Kerboranê li dijî êrişên qirkirinê yên li ser Rojavayê Kurdistanê dimeşe û êrişan şermezar dike û piştgiriya xwe bo Rojava nîşan dide.
Platforma Saziyên Demokratîk têkildarî êrişên li dijî Rojava li navçeya Kerboran a Mêrdînê meşek li dar xist. Parlamenterên DEM Partiyê, hevşaredar, endam û rêveberên partiyên siyasî û saziyên sivîl ên civakî di nav de gelek kes tev li meşê bûn. Girseya ku li ber avahiya rêxistina DEM Partiyê ya Kerboranê kom bû pankartên li ser “Bila êrişan rawestînin, Rojava hêvî ye, berxwedan e, azadî ye. Xwedîderketina li Rojava Xwedîderketina li Mirovahiyê ye” û “Her xeleka porên me berxwedana me bihêz dike” dinivîsî û kezî li ser hilgirtin û dowîzên “Jin jiyan azadî” , “Bimre Koledar Bijî Kurdistan” , “Keziyên me tirsa we ye” , “Heke em nebin yek em ê herin yek bi yek” , “Berxwedan jiyan e” , “Rojava rûmeta me ye” û “Kobanê neket wê nekeve” rakirin. Girseya ku dirûşmên “Bijî berxwedana Rojava” , “Jin jiyan Azadî” “ Rojava rûmeta me ye” berz kir, bi fîrfîrokan jî deng derxist. Girseya ku ji Cadeya Mîdyadê dest bi meşê kir bi berzkirina dirûşm û sirûdan heta Qada Miradê Kinê meşiya.
