Serokê berê yê Partiya Karkeran a Îngilîstanê Jeremy Corbyn pêşnûma derbarê Rojava de pêşkêşî Parlamentoya Ingilistanê kir. Corbyn bi gotina, “Ez bi gelê Kurd re di nava piştevaniyê de me” piştgiriya xwe ji bo Rojava anî ziman. 28 parlementeran jî piştgirî dan pêşnûmayê.
Serokê berê yê Partiya Karkeran a Îngilîstanê Jeremy Corbyn mijara Rojavayê Kurdistanê anî rojeva Parlementoya Ingilîstanê. Corbyn bi armanca parastina rêveberiya xweser pêşniyarpirsek pêşkêşî parlamentoyê kir. Heta niha 28 parlementeran piştgirî daye pêşnûmayê.
Ji gelek partiyan parlementeran piştgirî dan
Ji hemû partiyên li Parlamentoyê wekîlan piştgirî dan pêşnûmaya Corbyn. Ji Partiya Karkeran Brian Leisman, Long Bailey, Neil Duncan, ji Partiya Keskan Carla Denyer, Sian Berry, Dr Elli Chowns û Galler Plaid Cymru parlamenter Liz Saville Robert’s, Ben Lake, Ann Davies, ji Parlamenterê SNPê Logan Seamus, ji Partiya Lîberal Demokrat Jardine Christine, Andrew George, ji Partiay DUP a ji Îrlandaya Bakur Jim Shannon pêşnûme îmze kirin.
‘Bila Hikûmeta Ingilîz ji bo qebûlkirina statûya gelê Kurd bixebite’
Di pêşnûmeyê de ji hikumeta Îngiliz tê xwestin ku li hemberî êrişên leşkerî bi roleke çalak a dîplomatîk rabe û bi taybetî ji bo statuya siyasî ya gelê Kurd bi destûra bingehîn bê misogerkirin bang tê kirin. Di pêşnûmeyê de tê xwestin, mafên civakî û siyasî yên gelê Kurd bêne naskirin. Di pêşnûmeyê de tê destnîşankirin ku ji bo naskirina ziman, nasname û xwerêveberiya Kurdan li Destûra Bingehîn a Sûriyeyê divê zexta navneteweyî bê xurtkirin.
Jeremy Corbyn helwesta gelê Kurd silav kir ku bi milyonan kesî daket qadan û li dora Rojava civiya. Corbyn ku bi riya Ajansa Nûçeya a Firatê (ANF) peyam da, bi bîr xist ku daxwazên rewa yên gelê Kurd û nasnameya Kurd li Tirkiye, Îran, Iraq, Sûriye û welatên din gelek caran hatin tepisandin. Corbyn wiha got, “Li Sûriyeyê bi rengekî eşkere ji bo hemû gelan û zimanan naskirin û nasname pêwîst e; lê belê pêwîstî bi dagirkeriya leşkerî ya li ser herêmên Kurdan yanî Rojava nîne. Pêwîstiya gelê Kurd bi êrişên leşkerî nîne. Li Tirkiye, Sûriye, Îran û Iraqê pêwîstî bi naskirina mafên gelê Kurd heye. Pêwîstiya gelê Kurd careke din bi dostan û piştevanan heye. Di nava me de gelek kesan ev mijar xistin rojeva Parlamenta Brîtanyayê. Gelekan ji me hefteya derbasbûyî bi komên cuda yên Kurd ên hatin parlamentê li hev kom bûn ku ji niha û pê ve dikarin çi bikin, nîqaşa wê yekê kirin.”
Corbyn ev bang li gelê Kurd kir: “Ez dibêjim, em bi hev re bixebitin. Ji bo xurtkirina nasnameya Kurd em bi hev re bixebitin. Li hemberî hovîtiya êrişên leşkerî ku bi salan li gelek deveran bû sedema mirina gelek mirovan, ji bo parastina gelê Kurd em bi hev re bixebitin. Ji bo Rojava em bi hev re bixebitin û bi hev re biparêzin. Ez piştgiriyê didim gelê Kurd.”
