Hevserokê Giştî yê DEM Partiyê Tuncer Bakirhan diyar kir ku hem li Rojava û hem jî li Bakur rewşa wan bi heybet e û wiha got: “Tu kes nikare xwişk-biratiya gelê Kurd û Tirk hilweşînê lê em ê bi maf û hebûna xwe bi hev re bijîn. Em ê bi zimanê xwe bi hev re bijîn.”
Partiya Wekhevî û Demokrasiyê ya Gelan (DEM Partî) bi tevlîbûna Hevserokê Giştî Tuncer Bakirhan û endama Heyeta Îmraliyê ya DEM Partiyê Pervîn Buldan re li oteleke navenda Dîlokê civîna gel a Aştî û Civaka Demokratîk li dar xist. Dayikên Aştiyê, endam û nûnerên saziyên civakî, rêxistinên Partiya Herêmên Demokratîk (DBP) û DEM Partî ên Dîlok û navçeyên wê, parlamentera Partiya Kedê (EMEP) a Dîlokê Sevda Karaca jî tevlî civîna gel bûn. Di civîna gel de dirûşmeyên, “Bijî berxwedana Rojava”, “Bjî Serok Apo”, “Bê serok jiyan nabe” û “Rojava Rojhilat e Kurdistan yek welat e” berz kirin. Civîna gel ji bo cangoriyên di têkoşîna azadî û demokrasiyê de jiyana xwe ji dest dane bi deqîqeyeke rêzgirtinê destpê kir. Di rêzgirtinê de girse bi yek dengî dirûşmeya, “Şehîd namirin” berz kir.
Piştî rêzgirtinê hevserokê DEM Partî yê Dîlokê Fesîh Yeşîl axivî û diyar kir ku wan ji bo pêvajoya Aştî û Civaka Demokratîk ji gel re bidin fêmkirin civîna gel li dar dixînin.
Piştre jî endamê Meclisa Partiyê yê DEM Partiyê Mehmet Bozgeyik diyar kir ku pêvajoya Aştî û Civaka Demokratîk a bi pêşengiya Rêberê Gelê Kurd Abdullah Ocalan destpêkiriye û ji bo aştî û demokrasiyeke mayînde ew ê têkoşîna xwe bidomînin.
‘Rewşa me bi heybet e’
Piştre jî Hevserokê Giştî yê DEM Partiyê Tuncer Bakirhan axivî. Tuncer Bakirhan anî ziman ku ew ji bo hem pêvajoya li Tirkiyeyê destpêkiriye û hem jî li ser rewşa Rojava ji bo gel agahdar bikin civîneke bi vî rengî dar dixînin û got ku bila tu kes xeman nexwin rewşa wan bi heybet e. Tuncer Bakirhan bertek nîşanî operasyonên li dijî ESPê da û wiha got: “Em jî dibêjin ew çi nakokî ye. Em vê yekê qebûl nakin. Divê demildest hevalên me yên ESPê bên berdan û hişê mirovan şîlo nekin. Li şûna hûn ê hevalên ESPê bigirin yên ku di erdhejê de bûne sedema mirina ew qas welatiyan bigirin. Em bang li desthilatê dikin ku dev jî van polîtikayan berdin.”
‘Birêz Ocalan ji roja destpêke ve di nava hewldanan de bû’
Tuncer Bakirhan di berdewama axaftina xwe de bal kişand ser geşedanên Rojava û wiha pê de çû: “Ev meheke ku em hemû bi fikar in. Em van êrişan qebûl nakin. Gelê me jî li çar aliyên welat qebûl nekir. Gelê Kurd û dostên Kurdan li her derê rabûn ser piyan û gotin em nahêlin komkujî pêk were. Hezar carî em spasiya hemû kesên ji bo Rojava li ser piyan bûn dikin. Rojava ne bi tenê ye. Rojava Amed e. Rojava Silemaniyê ye. Rojava Kurd e, Tirk e, karker e. Em spasiya hemû pêşengên Kurd ên ji bo Rojava di nava hewldanan de bûn dikin. Spasiya herî mezin jî ji bo birêz Abdullah Ocalan dikin. Ji roja destpêke û heta niha birêz Ocalan di nava hewldanan de bû. Ji HSDê re got ku bi Şamê re di nava diyalogê de be. Ji Şamê re jî got ku Kurdan qetil nekin. Ji Enqereyê re jî got nekevin nav plana komkujiya li dijî Kurdan. Ji me re jî got ku xwedî li Rojava derbikevin. Peymana 30ê çileyê jî mafê gelê Kurd misoger kir. Kurd ne tenê li Rojava dê bibin hevparê rêveberiya Şamê jî. Hem dê xaka xwe rêvebibin û hem jî ji bo Sûriyeyeke demokratik têbikoşin. Divê êdî em xwedî li wê peymanê derbikevin û ji bo hikûmeta Şamê li gor peymanê tevbigere di nava hewldanan de bin.”
‘Em ê bi hev re di nava wekheviyê de bijîn’
Tuncer Bakirhan bi lêv kir ku li Tirkiyeyê pirsgirêka Kurd heye û peywira wan ew e ku di vê pêvajoyê de pirsgirêka Kurd çareser bibe, Kurd mafên xwe misoger bikin û Tirkiyeyê jî demokratik bikin. Tuncer Bakirhan diyar kir ku ew alîgirên aştiyê ne û wiha dirêjî da axaftina xwe: “Divê hemû kes piştgiriya vê pêvajoyê bike. Divê girtiyên siyasî bên berdan. Berdana girtiyên siyasî deynê stûyê me ye. Li meclisê komîsyonek ava bûye. Komîsyon jî em nizanin çima lê berê xwe dabû Rojava û li benda geşedanên li wir bû. Niha li wir sererastkirinek heye divê komîsyon jî berê xwe bide demokratîkkirina vir. Divê komîsyon di rapora hevpar de cih bide mafê hemû gelan. Li Dîlokê Kurd û Tirk bi hev re têkoşiyan. Lê çima Kurd nebin xwedî maf. Tu kes nikare xwişk-biratiya gelê Kurd û Tirk hilweşîne û em ê bi maf û hebûna xwe bi hev re bijîn. Em ê bi zimanê xwe bi hev re bijîn. Zimanê me Kurdî ye divê zimanê me qebûl bikin. Em ê bi hev re wekhev û di nava demokrasiyê de bijîn. Divê em rêxistina xwe jî xurttir bikin. Divê gelê me yê Dîlokê jî ji bo rêxistinkirinê seferber bibe.”
Piştî axaftina Tuncer Bakirhan civîn ji çapemeniyê re girtî berdewam kir.
