Meclisa Sûriya Demokratîk (MSD) diyar kir ku tekane riya çareseriya siyasî ji bo Sûriyeyê pergala nenavendî ye û daxuyand ku ji bo vê jî diyalogê ya Sûriyeyî-Sûriyeyî rêbaza herî girîng e. Her wiha MSDê pêşniyarên xwe ji bo pêvajoya nû ji raya giştî re ragihandin.
MSDê têkildarî geşedanên dawî civînek pêk anîn û têkildarî encamên civînê daxuyaniyek da çapemeniyê. Di daxuyaniyê de hate ragihandin ku avakirina dewleteke demokratîk a pir rengî ya nenavendî ye ku yekitiya welat diparêze û rûmeta tevahî xelkên wê bêyî cudahî misoger dike. MSDê destnîşan kir ku pêşketinên bi lez ên li Sûriyeyê diqewimin, bi beşdarbûna çalak a avakirina dewletek hemwelatîbûn û hiqûqê, li ser bingeha peymanek neteweyî ya berfireh û hevkariyek dadperwerî dikare aramiyê mayînde bike.
‘Peymana 29ê Çile gavek ber bi çareseriyê ve ye’
MSDê destwerdanên derve di kar û barên Sûriyeyê de û pişta xwe dayîna aliyên herêmî yan jî navneteweyî li ser hesabê serweriya neteweyî red dike û girîng da avakirina têkiliyên heseng bi dewletên herêm û cîran re li gorî pransîbên rêzgirtina dualî û berjerwendiyên hevbeş. Di daxuyaniya MSDê de piştgiriya xwe ji bo serkeftina lihevkirina 29ê Çileyê dubare kir ku gavek ber kêmkirina aloziyê û vekirina rê li pêş rêveçûna siyasî ya berfireh ve ye.
‘Divê destûrek mafên kêmaran diparêze bê çêkirin’
Di daxuyaniyê wiha hate gotin: “Ji bo tevlêbûna nafa peymana neteweyî ya nû pêwistî bi rêgezek wekhevî û nenavendbûnê ya li ser bingeha hişmendiyek demokratîk heye. Divê binesaziya rêxistinî û siyasî li gorî vê yekê bê sazkirin. Divê destûrek mafên neteweyî yên gelê Kurd nas dike, mafên çand, zimanî û neteweyî yê pêkhateyên Suryan, Asûrî, Tirkmen, Ermen û Çerkes biparêze were sazkirin.” Di dewama daxuyaniyê de hat gotin ku divê beşdariya giştî û wekhev ya jinan di jiyana siyasî û cihê biryardanê de hebe, ciwan werin xurtkirin û tev li tevahî merheleyên proseya siyasî û civakî bên kirin.
MSD dê ji bo Sûriyek demokratîk bixebite
MSDê banga avakirina saziyeke leşkerî ya neteweyî ya pîşeyî ya yekgirtî bi rêya rêveçûna entegrasyona lihevkirî kir û bal kişand ser van xalan. “Pejirandina edaleta pêvajoya veguhêz ji bo çareserkirina şopên borî, aşkerakirina rastiyan û avakirina şert û mercên vegera ewle û rûmet ya koçberan pêwistiyên lezgîn in.” Di dawiyê de MSDê da zanîn ku ew bi awayekî erênî ji bo şikildana siberoja Sûriyeyê kar dike, tevahî enerjiya xwe bo xizmeta projeya neteweyî ya berfireh a bi armanca avakirina Sûriyek demokratîk bi kar tîne.
