Baroya Amedê rapora xwe ya bi navê “Pêşniyar û Nêrînên Hiqûqî yên Têkildarî Pêvajoya Aştiya Civakî û Entegrasyonê” bi civîna çapemeniyê li avahiya xwe eşkere kir. Baroyê di rapora xwe de xwest ku Komîsyona Meclisê fesixkirina PKKê tespît bike û PKK ji lîsteya terorê bê derxistin.
Baroya Amedê rapora xwe ya bi navê “Pêşniyar û Nêrînên Hiqûqî yên Têkildarî Pêvajoya Aştiya Civakî û Entegrasyonê” bi civîna çapemeniyê li avahiya xwe eşkere kir. Beriya rapor bê aşkerekirin Cîgira Serokê Baroyê Amedê Şîlan Çelîk daxuyanî xwend.
Di daxuyaniyê de Şîlan Çelîk got ku ev rapor ji encamên lêkolînên dirêj û nirxandinên hiqûqî yên berfireh pêk hatiye û armanca wê avakirina bingehên hiqûqî yên aştiyeke domdar e. Şîlan Çelîk di axaftina xwe de got: “Em bawer dikin ku pêvajoya aştiya civakî bê edalet û bê pejirandina rastiyê pêk nayê. Aştiya rast tenê bi naskirina êş û ziyanên borî û bi berpirsyariyê dikare were avakirin.”
Şîlan Çelîk hevdîtinên ku Komîsyona Meclisê bi partiyên siyasî û sazî û dezgehên civakî re pêk anî bi bîr xist û wiha got: “Di vê qonaxê de, pêdiviya herî bingehîn ji bo pêşveçûna pêvajoyê ber bi aştiyeke mayînde ev e; Avakirina çarçoveyeke hiqûqî ya taybet e ku bidawîbûna pevçûnên çekdarî bi garantiyên qanûnî ve girê dide, entegrasyona civakî derdixe holê û bi prensîbên dewleta hiqûqê ya demokratîk re lihevhatî ye.”
‘Divê dewlet rola xwe ya bingehîn bilîze’
Şîlan Çelîk bi lêv kir ku di nav lêkolîna wan de nêrîn û pêşniyarên wan ên berfireh hene ku pêvajoya entegrasyonê divê li ser bingeha mafên mirovan, serweriya hiqûqê û prensîbên demokratîkbûnê were meşandin. Şîlan Çelîkê anî ziman ku divê dewlet di vê pêvajoyê de rola xwe ya bingehîn bilîze û şertên hiqûqî û siyasî yên pêwîst biafirîne. Şîlan Çelîk bang kir ku hemû aliyên civakî û dewletî bi berpirsiyarî tev li vê pêvajoyê bibin û got: “Ev rapor ne tenê belgeyek hiqûqî ye, her wiha bangek e ji bo avakirina aştiyeke domdar, adil û li ser bingehên rastiyê.”
Baroyê pêşniyarên xwe rêz kirine
Şîlan Çelîk pişt re rapora ku ji pênc beşan pêk tê ji rayagiştî re aşkere kir. Di van beşan de rewşa hiqûqî ya heyî, encamên pevçûnên borî, berpirsyariya dewletê, mekanîzmayên edaletê û rêyên entegrasyona civakî hatine nirxandin. Di raporê de her wiha hatiye destnîşan kirin ku pêvajoya aştiyê divê bi beşdariya aktîf a civakê, rêxistinên sivîl û şertên demokratîk were meşandin. Baroya Amedê di dawiya raporê de pêşniyarên xwe rêz kirine. Pêşniyarên Baroyê wiha ne: “Divê pêvajoya entegrasyonê bi awayekî hiqûqî bê garantîkirin. Divê ‘Qanûna Têkoşîna bi Terorê re’ bê betalkirin. Divê ji aliyê Komîsyona Meclisê ve fesixkirina PKKê bê tespîtkirin û ji ber PKKê çek danîne divê ji lîsteya terorê bê derxistin. Ji bo entegrasyona jin û ciwanan divê polîtîkayeke taybet bê diyarkirin. Ji bo ku demokratîkbûn û reformên hiqûqî û pêvajoya entegrasyonê mayînde be, divê prensîbên hiqûqa demokratîk ên Tirkiyeyê werin xurtkirin. Divê komîsyonên heqîqet, selihîn û hafizaya civakî bên avakirin. Divê hevkariya navneteweyî were misogerkirin.”
