Hevserokê Giştî yê DEM Partiyê Tuncer Bakirhan di komcivîna partiya xwe de wiha got: “Birêz Abdullah Ocalan xwe amade dike ku ji bo çareseriya demokratîk a pirsgirêka Kurd bangeke dîrokî bike.”
Hevserokê Giştî yê DEM Partiyê Tuncer Bakirhan di komcivîna partiya xwe ya li Meclisê geşedanên di rojevê de nirxand. Tuncer Bakirhan bal kişand ser tayînkirina qeyûman, êrişên li ser Bendava Tişrînê û çareserkirina pirsgirêka Kurd.
Tuncer Bakirhan ji ber gavneavêtin û zimanê desthilat bikar tîne rexneyan li rayedarên desthilatê kir û bal kişand ser daxuyaniyên Rêberê PKKê Abdullah Ocalan.
‘Birêz Ocalan wê bang bike’
Tuncer Bakirhan di nav axaftina xwe de bal kişand ser banga dîrokî ya Rêberê PKKê Abdullah Ocalan û ev banga girîng li desthilatê kir: “Birêz Abdullah Ocalan xwe amade dike ku ji bo çareseriya demokratîk a pirsgirêka Kurd bangeke dîrokî bike. Em ji vir bang li desthilatê dikin ku li gorî giraniya vê bangê bi rola xwe ya dîrokî rabe.”
