Berxwedana gel a li pêşiya Şaredariya Akdenîzê ya di bin dorpêça polîsan de, didome. Di daxuyaniya li ber şaredariyê hate dayîn de wiha hate gotin: “Heta ku bi paş ve gavê biavêjin em ê li Akdenîzê li ser piyan bin. Em vê hiqûqa sûc qebûl nakin. Divê em li dijî faşîzmê bibin yek xwe birêxistin bikin, di aştiyê de israr bikin.”
Hevşaredarên Akdenîz a Mêrsînê yên DEM Partiyî Hoşyar Sariyildiz û Nûriye Arslan û hin endamên Meclisa Şaredariyê îro di danê sibehê de di encama serdegirtinên malan de hatin desteserkirin. Bertekên li dijî vê yeke berdewam dikin. Endam û rêveberên DEM Partiyê, nûnerên saziyên sivîl ên civakî û gelek kes ên li ber avahiya şaredariya di bin dorpêçê de kom bûn çalakiyên xwe yên protestoyê didomînin. Platforma Ked û Demokrasiyê ya Mêrsînê, serdana girseya li ber avahiya şaredariyê li ber xwe dide kir û li wir daxuyanî da. Endam, rêveber û parlamenterên DEM Partiyê, nûnerên saziyên sivîl ên civakî û gelek kes beşdarî daxuyaniyê bûn.
‘Operasyona antî demokratîk êrişeke li dijî rêveberiyên herêmî ye’
Di daxuyaniyê de li ser navê platformê Kemal Goçmen metna daxuyaniyê xwend. Goçmen bertek nîşanî binçavkirina hevşaredaran, endamên meclisa şaredariyê û hewldana qeyûm da û diyar kir ku dê destûrê nedin vê bêhiqûqiyê. Kemal Goçmen, diyar kir ku weke Platforma Ked û Demokrasiyê ya Mêrsînê vê operasyona antî demokratîk û bêhiqûqî û tayînkirina qeyûm êrişeke li dijî saziyên demokratik û rêveberiyên herêmî dibînin.
Cîgirê Hevserokên Giştî yên DEM Partiyê û parlamenterê Êlihê Mehmet Ruştu Tiryakî jî diyar kir ku gelê Akdenîzê û Mêrsînê vê bêhiqûqiyê qebûl nake û wiha got: “Em rewabûna xwe ji piştgiriya gel digirin. Gel vîna xwe danî holê û biryar da ku Şaredariya Akdenîzê DEM Partî bi rê ve bibe. Lê desthilata siyasî, siyaseta qeyûman didomîne. Dema sala 2016an de çîrokek gotin. Gel di sala 2019an de ji qeyûman re got na. Pişt re dîsa çîrokek gotin. Naxwazin gelê kurd xwe bi rê ve bibe. AKP vê siyaseta xwe didomîne. Gel di sindoqê de bersiv da desthilatê û ji qeyûman re got na. Desthilat heman siyaseta xwe didomîne û bi çîrokên cûda şaredariyên me xesp dikin. Dibêjin derbarê wan de lêpirsîn heye. Em dizanin ku dozgerên we çawa lêpirsînên kûmpasan bi rê ve dibin. Em vê qebûl nakin. Ev bêhiqûqî ye. Gel tercîha xwe kir. Em ji desthilatê dixwazin ji vê yekê re rêzê bigirin.”
‘Em ji serê sibê ve li vir in’
Ruştu Tiryakî da zanîn ku şaredarî bi barîkatan hatiye dorpêçkirin, nahêlin xebatkar û endamên Meclisa Şaredariyê bikevin hundir û wiha got: “Em ji serê sibê ve li vir in. Heta ku bi paş ve gavê biavêjin em ê li Akdenîzê li ser piyan bin.”
‘Em ê ji bo aştiyê têbikoşin’
Ruştu Tiryakî di dawiya axaftina xwe de wiha got: “Em dixwazin pirsgirêka kurd bi awayekî demokratîk were çareserkirin. Desthilata siyasî peyamên aştiyê dide. Heke li aliyekê peyaman bidin û li aliyê din qeyûman tayîn bikin, hûn nikarin vî gelî ji vê pêvajoyê re bidin bawer kirin. Hûn ê zirarê bidin hêviya aştiyê. Em li dijî qeyûm û siyaseta qeyûm in. Em ê ji bo aştiyê têbikoşin.”
‘Îro roj roja hevgirtinê ye
Parlamentera DEM Partiyê ya Mêrsînê Perîhan Koca ku pişt re axivî, diyar kir ku serê sibê dîsa bi opreasyoneke xespê hişyar bûn û wiha got: “Sûcek tê kirin. Bêhiqûqiyek û hiqûqa dijminatiyê heye. Polîs dibêjin ferman girtine ku nikarin kesê bigirin hûndir. Ev sûc e. Em vê hiqûqa sûc qebûl nakin. Îro roj roja hevgirtinê ye. Divê em li dijî faşîzmê bibin yek xwe birêxistin bikin, di aştiyê de israr bikin.”
Daxuyanî bi berzkirina dirûşmên “Bijî îradeya gelê kurd” , “Bêdeng nebe biqîre, ji qeyûm re na” , “Li dijî faşîzmê mil bidin milê hev” , “Bijî xwişk û biratiya gelan” bi dawî bû.
