DBP, DEM Partî û TJA li Şirnexê li dijî êrişên Tirkiyeyê û çeteyên giredayî wê li ser Bendava Tişrînê daxuyanî dan û kuştina sivîlan şermezar kirin.
Rêxistinên Partiya Herêmên Demokratik (DBP), Partiya Wekhevî û Demokrasiyê ya Gelan (DEM Parti) ên Şirnexê û Tevgera Jinên Azad (TJA), li dijî êrişên Tirkiyeyê û çeteyên girêdayî wê yên li ser Bendava Tişrînê daxuyanî da û nerazîbûn nîşanî êrişan dan. Daxuyanî li ber avahiya DEM Partiyê ya Şirnexê hat dayîn. Dayikên Aştiyê, Parlamenterê DEM Parti yê Şirnexê Mehmet Zekî Îrmez û nûnerên saziyên sivîl ên Şirnexê û gelek kes tev li daxuyaniyê bûn. Girseyê di daxuyaniyê de pankarta bi nivîsa “Rojava rûmeta me ye” hilgirtin û bê navber dirûşmeyên, “Rojava rûmeta gelê Kurd e”, “Bijî berxwedana Rojava” û “Berxwedan jiyan e” berz kirin.
Di destpêkê de Hevserokê DEM Partiya Şirnexê Abdullah Gungen axivî û ev yek anîn ziman: “Em êrişa li ser sivîlan lanet dikin. Ev desthilat ji aliyekî ve qala aştiyê dike lê li aliyê din jî êrişî Rojava û gelê Kurd dike. Bêtehamûlî li ser gelê Kurd heye. Aştî û xwişk û biratî wiha nabe. Ev polîtîkayên we bi ser nakevin. Ji bilî aştiyeke mayindê tu rê tune ye. Em bi salan e tên kuştin. Lê dîsa jî em dev ji aştiyeke bi rûmet bernadin. Heta aştî pêk neyê ne gelê Kurd û ne jî gelên Tirkiyeyê nagihijîn aramiyê. Divê hemû kes li gorî pêvajo û ruhê demê tevbigere.”
‘Çawa ku DAIŞ bi ser neket ew jî bi ser nakevin’
Parlamenter Mehmet Zekî Îrmez jî axivî û bi lêv kir ku li Bendava Tişrînê welatiyên sivîl dibin armanca êrişan û wiha got: “Ev 13 sal in li Sûriyeyê komkujiyên mezin pêk hatin. Gelê Kurd li ser bingeha xeta 3yemîn bi gelê herêmê ve xwe parast. Li dijî DAIŞê berxwedanek dîrokî hat nîşandan û DAIŞ têk bir. Bi berxwedan û têkoşîna xwe gelê Kurd li hemû dinyayê hat hezkirin. Êrişên Tirkiyeyê li ser herême ranewestiyaye. Li ser gelê Rojava êrişên hovane pêk tînin. Ev zêdetirî 40 roj in li dijî Rojava êrişên Tirkiyeyê û çeteyên giredayî wê berdewam dike. Wan êrişan li dijî pergala Rojava pêk tînin. Lê bi ser nakevin. Çawa ku DAIŞ bi ser neket ev jî wê bi ser nekevin. Wê tevî hemû êrişên we jî pergal û feraseta Rojava bi ser bikeve. Tevî ku qala pêvajoyekê tê kirin jî êrişên Tirkiyeyê li ser gelê Kurd berdewam dikin. Ji bo wê jî gelê me bifikar e. Divê demildest pirsgirêka Kurd bê çareserkirin. Ev pêvajo ber bi merhaleyekê ve diçe. Em êrişên li ser Rojava şermezar dikin û divê ew êriş bên rawestandin. Zarok û jin jî di nav de zarok tên kuştin. Divê dawî li van êrişan bê anîn. Hevdîtinên di navbera aliyên Kurdî yên hefteyek dawî de hêviyek mezin ji bo gelê Kurd çêkir. Heke yekitiya Kurdan ava bibe ji bo hemû gelên Rojhilata Navîn wê serkeftinê bîne. Em careke din bang li rêyedarên Tirkiyeyê dikin ku dev ji van êrişan berdin.”
Daxuyanî bi berzkirina dirûşmeyan bi dawî bû.
