Şaxa Platforman a KESKa Şirnexê bi daxwaza mûçeyên xebatkarên tenduristiyê were başkirin ji bo rojekê dest ji kar berda.
Şaxa Platformên Konfederasyona Sendîkayên Kedkarên Cameweriyê (KESK) a Şirnexê, ji bo mûçeyên kedkarên tenduristiyê were başkirin, bi dirûşmeya, “Em li dijî zamê, sefaletê ji bo mûçeyeke têrî jiyaneke mirovî bike, em dest ji kar berdidin” daxuyanî da. Daxuyaniya ku li Kolana Hûnerê ya Cizîrê hat lidarxistin, endam û nûnerên sendîkayên giredayî KESKê tev li bûn. Rêxistinên Partiya Herêmên Demokratik (DBP), Partiya Wekhevî û Demokrasiyê ya Gelan (DEM Partî) ên Şirnex û navçeyên wê û endamên saziyên sivîl ên Şirnexê û parlamenterê DEM Partî yê Şirnexê Mehmet Zekî Îrmez jî piştgirî dan kedkaran. Di daxuyaniyê de pankarta “Li dijî ferzkirina sefaletê, têkoşîna ji bo jiyaneke mirovî” hat vekirin.
Beriya daxuyaniyê girsê li Kolana Hunerê govend gerandin û dirûşmeyên, “Bi berxwedanê em ê bi ser bikevin”, “Serkeftin a kedkaran e, wê kedkar li ber xwe didin” berz kirin.
‘Kedkar bi xizaniyê re rû bi rû tên hiştin’
Daxuyanî ji aliyê Sekreterê Şaxa SESê ya Şirnexê Kadîr Oruker ve hat xwendin. Kadîr Oruker anî ziman ku ji ber bihabûn û mûçeya kêm kedkarên tenduristiyê bi xizaniyê re rû bi rû tên hiştin û ji bo mûçeyeke baş bê dayin wan biryara grevê girtî ye û rojekê çalakiya dest ji kar berdanê li dar xist. Kadîr Oruker da zanîn ku heta daxwazên wan pêk bên ew ê li hemû şaxên xwe çalakiyê bidomînin.
Oruker daxwazên kedkaran wiha anîn ziman:
“* Em ji bo hemû kedkaran meaşeke însanî û dabeşkirina dahatê ya adil dixwazin
* Karê wekhev; em heqê wekhev dixwazin.
* Li dijî vê fêlbaziya xizaniyê, em daxwaz dikin ku bi lezgîn mûçeya herî kêm a karmendan li ser sînorê xizaniyê, ango 79 hezar TL were zêdekirin.
* Em daxwaza alîkariya kirê dikin ku li gorî daneyên heyî li hember bihayên kirê yên ku hewcedariyên me yên xaniyan ne mumkin dike.
* Em daxwaz dikin ku mûçeya herî kêm di asteke li gor rûmeta mirovan de bê zêdekirin.
* Em daxwaz dikin ku li cihên kar kreşên bêpere bên vekirin.
* Em daxwaz dikin ku bilindkirin û pereyên zêde di teqawîtbûna me de werin kirin û em karibin di teqawîtbûnek însanî de bijîn.
* Em di bacê de dadmendiyê dixwazin, ji bo yên ku kêm qezenc dikin kêmtir, ji bo yên ku zêde distînin zêdetir, bi gotineke din, sîstemek bacê ya adil û kêmkirin û sererastkirina benda 1. ya 10% dixwazin.
*Li hember qanûna sendîkayan a sexte ya ku di bin navê maseya peymana kolektîf de me di navbera lêvên desthilatdariya siyasî de dihêle û hemû desthilatdarî û biryarê ji hikûmetê re dihêle, bi grevek rast em peymaneke kolektîf dixwazin
*Em bi vê wesîleyê bi raya giştî re parve dikin ku ger daxwazên me yên mafdar û rewa neyên cih, em ê têkoşîn û hevgirtina xwe mezintir bikin û çalakiyên xwe li her qadên welat bidomînin.”
Daxuyanî bi berzkirina durişmeyan bi dawî bû. Piştî daxuyaniyê xebatkarên tenduristiyê greva xwe ya rojekî domandin.
