Rêveberiya Şamê serçete Ehmed El Hayis yê ku di sala 2019an de Sekretera Giştî ya Partiya Sûriya Pêşerojê Hevrîn Xelef qetil kiribû, wekî fermandarê Firqeya 86an erkdar kir. Ebû Şeqra di lîsteya DYAyê de cih digire.
Li gorî nûçeya ANHAyê; Wezareta Parastinê ya Şamê serçete Ehmed El Hayis (Hatim Ebû Şeqra), yê ku Sekretera Giştî ya Partiya Sûriya Pêşerojê Hevrîn Xelef qetil kiribû, wekî fermandarê Firqeya 86an erkdar kir. Erkdarkirina Şeqra yê ku ji aliyê Komîsyona Mafên Mirovan a Neteweyên Yekbûyî ve wekî “sûcê şer” hatibû ragihandin, di nav Kurdan de rê li ber hêrseke mezin vekir.
Serçete Ehmed Îhsan Feyad El Hayis ji çeteyên “Ehrar El Şerqiye” ye û di Cotmeha 2019an de wî Hevrîn Xelef û ajokarê wê Ferhad Remedan qetil kiribû. Ev sûc jî li ser asta navneteweyî bi girseyî hatibû şermezarkirin.
Wezareta Xezîneyê ya Amerîkayê jî di 2021an de ji ber binpêkirinên li dijî mafên mirovan nexasim qetilkirina bi sedan sivîl di girtîgehekê de ku “Hatim Ebû Şeqra” berpirsê wê bû ceza li wî û li hin çeteyên “Ehrar El Şerqiye” birîbû.
Heman wezaretê bi tohmeta bazirganiya bi jin û zarokên Êzîdî û tevlêkirina çeteyên DAIŞê di nav refên “Ehrar El Şam” de, ceza li wî birîbû.
Di raporeke Rêxistina Efûyê ya Navneteweyî (EMNESTY) de di Tebaxa 2018an de, sûcdariaya çeteyên “Ehrar El Şerqiye” di revandin, girtin û talankirina mal û milkên sivîlan li deverên wan dagir kirine de, hat belgekirin.
