Amed – Bi pêşengtiya Komeleya Berî Her Tiştî Zarok û bi tevlibûna gelek saziyên sivîl ên ji bajarên heremê dê di 17-18ê Gulanê de li Amedê Komxebata ‘Ji nû ve Avakirina Bajaran a bi Zarokan re” bê lidarxistin. Endama Komeleyê Hîvran Tîmûr destnîşan kir ku armanca wan ew e ku li ser maf, perwerde û zimanê zarokan perspektîfeke hevpar ava bikin.
Komeleya Berî Her Tiştî Zarok bi hevkariya Zarok TV, Konseya Bajêr a Amedê, Şaredariya Bajarê Mezin a Amedê û Weqfa Koçberiyê dê di 17 û 18ê Gulanê de li Parka Sumerê ya Amedê “Komxebata Ji nû ve Avakirina Bajaran a bi Zarokan re” li dar bixe. Dê ji Amedê û ji gelek bajarên bakurê Kurdistan saziyên sivîl tev li komxebatê bibin.
Komxebata ku dê saet di 09:30an de dest pê bike bi armanca ku ji bo mafên zarokan, beşdariya jiyana bi hev re ya li bajaran û veguherîna demokratîk zemîna hizirîn û hilberîneka pardar ava bike tê lidarxistin.
Saziyên ku komxebatê li dar dixin banga tevlibûnê kirin û wiha gotin: “Em ji xwe ra dikin armanc ku bi beşdarên ku dê ji dezgeh û dîsîplînên cuda werin bahev, pêşnîyazên polîtîkayan yên şênber geş bikin û gavên wisa biavêjin ku dikarin bên sepandin.
Em bawer dikin ku tecrubeyên me, xebat û danehevên me yên dezgehî û perspektîfên me parçeyên jêneger yên vê qonaxê ne.
Lewra kapasîteya afirandina veguherîneka mayinde û bimana; bi tenê dikare bi hewldaneka kolektîf ava bibe ku failên cuda tên gelhev û hev xurt dikin.
Em dê gelekî dilxweş bibin ku em di komxebatê de we di nav xwe da bibînin.”
Endama Komeleya Berî Her Tiştî Zarok Hîvran Tîmûr derbarê vê komxebatê de axivî.
‘Pêwîstî piştî hevdîtina bi 525 zarokan re derket holê’
Hîvran Tîmûr da zanîn ku fikra lidarxistina vê komxebatê piştî raporeke wan a ku salek berê hatibû amadekirin derketiye holê û wiha got: “Salek berê me li 5 bajaran raporek amade kir. Di vê xebatê de nêzîkî 623 kes amade bûn û me bi 525 zarokan re hevdîtinên rû bi rû pêk anîn. Me pirsên xwe rasterast ji zarokan pirsîn. Di encamê de me dît ku li qadê gelek binpêkirinên mafên zarokan hene. Piştî bersivên zarokan û tespîtkirina van binpêkirinan, bi referansa vê raporê pêwîstiya vê komxebatê derket holê.”
‘Ev komxebat ji bo hemû herêmê ye’
Hîvran Tîmûr bal kişand ser rola Amedê ya di xebatên zarokan de û destnîşan kir ku Amed di qada mafên zarokan de xwedî tecrubeyeke gelekî mezin e. Hîvran Tîmûrê diyar kir ku wan xwestiye vê tecrubeyê bi herêmê re parve bikin û got: “Me jî xwest bi rêya van tecrubeyan em hev bibînin lê ne tenê weke saziyên ku li Amedê dixebitin, me xwest ev komxebat ji bo hemû herêmê be. Em bêjin ji Agirî, Colemêrg, Wan, Mêrdîn û Mûşê jî dê nûnerên saziyên sivîl tev li vê komxebatê bibin. Armanc hinekî ew e ku di dawiya vê komxebatê de em perspektîfeke hevpar derxînin holê. Di 17 û 18ê Gulanê de em ê li Amedê, li Parka Sumerê bin.”
‘Dê mêvanê me ji Katalonyayê jî amade bin’
Hîvran Tîmûrê diyar kir ku heya niha 55 kesan serî li komxebatê daye û dê nêzîkî 30 saziyên sivîl jî beşdar bibin, lê ji ber ku wan giranî daye nûnertiya profesyonel a saziyan, komxebat ji bo beşdariya girseyî ne vekirî ye û wiha domand: “Di organîzasyona komxebatê de ji bilî Komeleya Berî Her Tiştî Zarok; Zarok TV, Konseya Bajar a Amedê, Şaredariya Bajarê Mezin a Amedê û Weqfa Koçê cih digirin. Her wiha bi rêya projeyekê piştgirî ji Katalonyayê jî hatiye girtin ku Ajansa Katalanî û hevalên wan ên ji Katalonyayê jî dê di komxebatê de amade bin.”
‘Armanc perspektîfeke hevpar a li ser perwerde û ziman e’
Hîvran Tîmûrê di dawiya axaftina xwe derbarê armanca sereke ya komxebatê wiha got: “Bi hatina nûnerên ji hemû herêmê, em dixwazin di derheqê jiyana zarokan, mafên wan û bi taybetî li ser perwerde û ziman perspektîfeke hevpar derkeve holê. Armanca me ew e ku em vê perspektîfa hevpar biafirînin û ji niha pê ve xebatên xwe bi vî rengî, bi hev re bimeşînin.”
