Hevserokê Konseya Bajêr a Wanê Fîkret Dogan di civîna têkildarî pirsgirêkên civakî yên li herêmê de û da zanîn ew bi hev re dikarin pêşî li pirsgirêkên civakî bigirin û got: “Banga Birêz Ocalan deriyeke nû ji bo jiyaneke nû vedike û divê em jî ji xwe dest pê bikin û jiyaneke nû bi hev re ava bikin.”
Konseya Bajêr a Wanê, têkildarî pirsgirêkên civakî yên li herêmê û pêvajoya çareseriyê li eywaneke dawetê ya li navçeya Tûşbayê ya Wanê civîna gel li dar xist. Di eywanê de pankta “Em ê bi hev re bajar bi rê ve bibin, em ê civaka aştî û demokratîk bi hev re ava bikin” hat daliqandin. Ji Wan û Colemêrgê rêveberên rêxistinên Partiya Herêmên Demokratîk (DBP) û Partiya Wekhevî û Demokrasiyê ya Gelan (DEM Partî), hevşaredarên DEM Partiyê, parlamenterên herêmê, partiyên siyasî û saziyên sivîl jî di nav de bi sedan kes tev li civînê bûn.
‘Pêvajo ji bo biratiyê dîrokî ye’
Hevserokê Konseya Bajêr Fîkret Dogan axaftina destpêkê kir. Fîkret Dogan da zanîn ku li Rojhilata Navîn şer roj bi roj mezintir dibe û wiha got: “Kapîtalîzm di nava qeyraneke mezin de ye û hêzên emperyalîst bi hemû hêza xwe vê herêmê talan dike. Pêşîlêgirtina vê yekê di aştiya navbera gelan de derbas dibe. Ev pêvajoya li welatê me pêş dikeve, ji bo biratiya gelan dîrokî ye. Banga birêz Ocalan deriyeke nû ji bo jiyaneke nû vedike û divê em jî ji xwe dest pê bikin û jiyaneke nû bi hev re ava bikin.”
Piştî axaftina destpêkê, dîwana ku ji Hevserokên Konseya Bajêr a Wanê Sevgî Ozdînç û Fîkret Dogan, Serokê Baroya Colemêrgê Ergun Canan, endamên konseyê parêzer Jiyan Ozkaplan û Şemsettîn Bakir pêk dihat, hat bijartin û paşê beşdar axivîn.
‘Ji bo çareseriyê divê aqleke hevpar bê avakirin’
Hevşaredara Bajarê Mezin a Wanê Neslîhan Şedal jî axivî û diyar kir ku her çiqas zext li ser wan hebin jî ew dê li gel gelê xwe bin. Neslîhan Şedal anî ziman ku gelê Kurd qewmek berxwedêr e û got: “Ji bo çareseriya pirsgirêkên civakî divê aqleke hevpar bê avakirin. Di encama polîtîkayên şerê taybet te pirsgirêkên civakî mezintir û kurtir dibe. Herî zêde jî pirsgirêkên jinan belav dibe. Di 27ê Sibatê de Rêberê Gelan Birêz Abdullah Ocalan banga aştiyê kir û ev bangawazî ji bo hemû gelan kir. Em soz didin ku ji bo bidawîkirina pirsgirêkên civakî çi bikeve ser milên me em ê bikin. Pîvana herî mezin ew e ku em tifaqiya xwe ya navxweyî ava bikin.”
‘Em ê li dijî vê zîhniyeta ku gelan dikin dijberî hev têbikoşin’
Hevşaredarê Bajarê Mezin Abdullah Zeydan jî bal kişand ser girîngiya civînê û got: “Pêdivî bi têgihîştineke hevpar û îradeyek heye ji bo çareserkirina pirsgirêkên civakî. Keda Birêz Abdullah Ocalan di vê pêvajoyê de pir mezin e. Civaka Tirkiyeyê piştgiriyê dide vê pêvajoyê û em ji her demê bêtir hêvîdar in. Em eşîretperestiya marjînalîze û polarîzeker a ku li dijî hişmendiya neteweyî ye red dikin. Ji ber vê yekê, her çend em bi tevahî piştgiriyê didin pêvajoya ku ji hêla Birêz Abdullah Ocalan ve hatiye destpêkirin, em di heman demê de diyar dikin ku em ê li dijî vê zîhniyeta ku gelan dikin dijberî hev, têbikoşin.”
Piştre Hevserokê DEM Partiyê yê Wanê Veysî Dîlekçî jî axivî û da zanîn ku ew ê li dijî tiştê ne li gorî çanda wan e, têbikoşin.
Gelek welatiyên beşdarî civînê bûn jî axivîn û nêrînên xwe anî ziman û ji bo çareseriya pirsgirêkan pêşniyariyên xwe vegotin.
Piştre dê encamnameya civînê bê eşkerekirin.
